I pyetur për çështjen e satelitëve shqiptarë në hapësirë, Rama tha se satelitët që deklaroi të enjten e shkuar në Parlament, do të shërbenin për të kontrolluar territorin, vjedhjet apo punimet e paligjshme në të.
Shqipëria do të ketë satelitë, u tha ai gazetarëve, e do t’i ketë shpejt, për të forcuar kontrollin mbi territorin e saj në të gjitha aspektet, e do të ketë, jo vetëm satelitë, por do të ketë dhe dronë inteligjentë që do të na ndihmojnë për ta çuar vendin në një nivel tjetër nga aspekti i administrimit të territorit të vet, dhe këto janë mjete të një teknologjie të re, që garantojnë një monitorim të territorit për shumë gjëra, që nga kufijtë, tek ndërtimet që kryhen në territor, tek monitorimi lidhur me informacionin që i duhet strukturave të shtetit për luftën kundër trafiqeve, për çuarjen deri në fund përpjekjet për të zeruar plotësisht territoret e kultivimit të lëndëve narkotike, për të mbjellat e bujqësisë, për shumëçka, dhe natyrisht edhe për të luftuar në mënyrë shumë cilësore krimin e organizuar.
Po t’ju them unë që satelitët lidhen edhe me ujin 24 orë, çfarë do thoni ju?, vazhdoi Rama. Nëpërmjet satelitëve e nëpërmjet droneve inteligjentë, ne do të kemi një kontroll të përditshëm mbi gjithë lumenjtë e Shqipërisë për shembull, e do të mund të identifikojmë çdo lloj ndryshimi apo çdo lloj ndërhyrje të paligjshme në shtretërit e tyre, ashtu sikundër do të kemi një kontroll të plotë edhe mbi mjedisin, duke identifikuar në kohë reale çdo lloj cenimi të mjedisit, për sa i përket vendgrumbullimeve ilegale të mbetjeve apo për sa i përket prerjes ilegale të pyjeve. Të gjitha këto shkojnë bashkë, nuk është se ne do çojmë satelit për të bërë kërkime në Mars. Ne na duhen sy inteligjentë të një kapaciteti që i tejkalon kapacitetet njerëzore, për të pasur në kohë reale informacion mbi territorin e vendit tonë e për të identifikuar në kohë reale çdo ndërtim pa leje që bëhet në Republikën e Shqipërisë. Gjithkush që kryen veprime të paligjshme në territorin e Shqipërisë e gjithkush që cenon territorin e Shqipërisë, do duhet ta ketë parasysh që është duke e parë dikush tjetër që nuk duket rreth e rrotull e që nuk mund të korruptohet, nuk mund të komprometohet, nuk mund të gjendet në asnjë lidhje krushqie e fare fisi, se është lart, sqaroi Rama, i cili nuk bëri të ditur ndonjë shifër se sa mund t’i kushtonin buxhetit të shtetit këta satelitë në këtë valë krizash, edhe pse u pyet prej gazetarit.
