Samiti dy-ditor në Hagë miratoi marrëveshjen midis 32 vendeve anëtare të Aleancës Atlantike për rritjen e shpenzimeve ushtarake deri në 5% të PBB-së vjetore deri në vitin 2035.
Presidenti i SHBA-së Donald Trump foli për një “fitore monumentale”, duke sulmuar më pas kryeministrin e Spanjës Pedro Sanchez, i cili kishte vendosur standardin për vendin e tij në 2.1% të PBB-së.
POR SI PO NDRYSHON ANGAZHIMI I VENDEVE ANËTARE?
Marrëveshja zyrtare përbëhet nga dy elementë, me 3.5% të PBB-së të caktuar ekskluzivisht për shpenzime ushtarake dhe 1.5% të mbetur për kosto të tjera të lidhura me sigurinë, siç janë telekomunikacioni dhe infrastruktura strategjike.
Spanja, së bashku me Italinë, Portugalinë dhe vende të tjera, është ndër anëtarët e NATO-s që vitin e kaluar nuk arritën objektivin prej 2% të vendosur për herë të parë në vitin 2006. I përballur me kërkesën për të rritur shpenzimet, Sanchez tha se për vendin e tij do të ishte ekuivalente me një përpjekje prej 350 miliardë eurosh, fonde që do të gjenden përmes “një rritjeje të taksave, një uljeje prej 40% të pensioneve ose një përgjysmimi të investimeve në arsim”.
Përballë protestave nga Madridi, Sekretari i Përgjithshëm i NATO-s Mark Rutte, e siguroi Sanchezin pwrmes një letre, se marrëveshja do të ofrojë “fleksibilitetin e duhur në arritjen e objektivave të kapacitetit ushtarak”.
ÇFARË OFRON DOKUMENTI I PËRBASHKËT
Bllokimi politik u zgjidh më pas me nënshkrimin nga të gjitha vendet anëtare, përfshirë Spanjën, të dokumentit të përbashkët, që angazhon “aleatët të investojnë 5% të PBB-së në mbrojtje dhe siguri deri në vitin 2035”. Në fund të samitit në Holandë, aleatët riafirmuan unitetin e tyre “përballë kërcënimeve dhe sfidave të thella për sigurinë, në veçanti kërcënimit afatgjatë që paraqet Rusia për sigurinë euroatlantike dhe kërcënimit të vazhdueshëm të terrorizmit”.
