Thuajse të gjitha fluturimet nga Rusia drejt destinacioneve të mundshme jashtë vendit, i kanë shitur të tëra biletat e tyre pak minuta pas deklaratës së bërë nga presidenti i vendit Vladimir Putin për mobilizimin e popullsisë, në kontekstin e referendumeve për t’u shpallur si pjesë e Rusisë, e katër rajoneve pro-ruse në Ukrainë.
Nga sa bëjnë të ditur mediat ruse, fluturimet nga Moska drejt kryeqyteteve të Gjeorgjisë, Turqisë dhe Armenisë, ishin shitur të gjitha për ditën e sotme vetëm pak minuta pas deklaratës së Putinit, dhe kjo referuar sajtit rus për fluturimet aviasales.ru .
Në mesditë me orën e Moskës, edhe udhëtimet direkte nga Moska në Azerbaxhan, Kazakistan, Uzbekistan dhe Kirgistan, nuk shfaqeshin më në sajtin më sipër.
Pas zërave që nisën të qarkullonin për mbylljen e kufijve, hekurudhat ruse dhe kompania ajrore Aeroflot, bënë me dije se nuk kanë marrë ende urdhër për të penguar burrat nga 18-65 vjec të blejnë bileta.
Një nga kanalet e Telegram-it që mbledh të dhëna mbi udhëtarët rus dhe kapërcimin e kufirit, pohon se janë rregjistruar vetëm episode të izoluara të rojeve që kanë rregjistruar burrat në moshë ushtarake.
Të dhënat e biletave përkojnë me pyetjen “si të largohemi prej Rusisë”, që renditej në majë të kërkimeve të google dje në mbrëmje (të martën), kur ishte programuar në fakt edhe fjala e Putinit, e cila u shty për të mërkurën (sot) në mëngjes
Njoftimi i sotëm i Putinit, nga sa bëjnë me dije mediat e huaja, i ka shpënë edhe aksionet ruse në nivelet më të ulta, që prej pushtimit të Ukraninës, më 24 shkurt.
