Ministri i ri i Brendshëm Ervin Hoxha, emëruar thuajse një muaj më parë në detyrë, ka bërë sot daljen e tij të parë publike, duke prezantuar publikisht edhe vizionin e tij për Policinë e Shtetit.
Teksa bëri një panoramë të asaj ku kishte qenë Policia e Shtetit përpara 2013, e të asaj ku kishte mbërritur sipas tij dekadwn e fundit, Hoxha njoftoi edhe ndryshimet e reja që do të bëheshin në trupën policore.
“Uroj që kështu ta shohë detyrën e re në karrierë edhe drejtori i ri i Policisë së Shtetit, dhe drejtuesit e rinj të qarqeve e të strukturave kyce të Policisë së Shtetit”, u shpreh ai, “në këtë kohë kyçe të Shqipërisë, e cila aplikon për anëtarësimin në BE. Ata do të zgjidhen në javën në vijim, me të njëjtën frymë, me të njëjtat kredenciale, të njëjtin profil tyrin profesional dhe meritës në punë. Asgjë nuk do të ndikojë në zgjedhjen e tyre, përveç meritës dhe integritetit. Ligji i ri i sapomiratuar i Policisë së Shtetit, merita kryesore për përmbajtjen shumë të mirë që i takon paraardhësit tim, zotit Taulant Balla dhe drejtuesëve aktualë të Policisë së Shtetit, është një platformë e shkëlqyer për reformimin dhe modernizimin e mëtejshëm të trupës sonë policore. Në bazë të këtij ligji, kam nxjerr udhëzimin për fillimin e procedurave për përzgjedhjen e drejtuesit të përgjithshëm të Policisë së Shtetit dhe në zbatim të tij, në detyrën e përkohëshme të drejtuesit të lartë të policisë, do të komandohet zëvendësdrejtori i përgjithshëm Sokol Bizhga. I ftoj të gjithë drejtuesit e Policisë së Shtetit, të cilët janë sipas rangjeve të parashikuara nga ligji, të kandidojnë për Drejtor të Përgjithshëm. Nëse kanë këtë ambicie, të mos ngurrojnë, procesi do të jetë i hapur dhe i pandikuar nga asgjë tjetër, përveç vlerave individuale të çdo kandidature”, përfundoi fjalën e tij ministri i Brendshëm Ervin Hoxha.
Kujtojmë që mbrëmë është bërë e ditur edhe dorëheqja e drejtuesit aktual të policisë, Rrumbullakut, duke krijuar me sa duket kështu hapësirë për krerët e rinj, emrat e të cilëve do të mësohen në vijim.
