Ka deklaruar krizën e radhës kreu i qeverisë Edi Rama, përmes një konference të jashtëzakonshme drejtuar shqiptarëve ditën e dielë. Në fjalën e tij Rama theksoi se kriza në prag qe ajo energjitike, e cila me gjasa do të jepte pasoja të forta edhe në ekonominë shqiptare.
Kjo krizë e re na vendos me detyrim përcaktim në një sprove të re, tha Rama, po aq sa tërmeti e pandemia në aspektin ekonomik e social. Dukuria e rritjes maramendëse e rritjes së çmimeve të gazit e karbonit në të gjitha tregjet ndërkombëtare, si dhe trendi i fortë i rritjes së çmimit të naftës, shoqëruar me një rritje të përgjithshme çmimesh prodhimesh e konsumi të përgjithshëm, qëndrojnë sot përpara te gjitha vendeve, mu si siluetat e një ushtrie armike në horizontin e dimrit të vështirë që bota ka përpara. Rritja eksponenciale e kërkesës së konsumatorit, pas hapjes së ekonomisë si rezultat i vënies nën kontroll të pandemisë, ka rritur edhe kërkesën e industrive prodhuese për energji, duke vënë në vështirësi serioze edhe vetë koloset, që nga Kina, ku mungesa e kapaciteteve energjitike të nevojshme, për përballimin e kësaj kërkese, kërcenon afro gjysmën e kapacitëteve industriale të atij vendi, deri ne Europë, ku kërkesa e lartë dhe oferta e pamjaftueshme për gaz, ka detyruar qeveritë, të përballen me rritje marramendëse çmimesh, paralajmërojnë deri dhe politika kufizimesh në furnizimin me energji elektrike. Ritmet e larta të rimëkëmbjes dhe nevoja e tejrritur për energji, e kanë rritur çmimin e gazit me 250%, çmimin e karbonit me rreth 80%, në një kohë që çmimi i naftës ka kërcyer nga 60 dollarë për fuçi në gusht të këtij viti, tek rreth 80 dollarë në momentin që flasim, me një projeksion që të shkojë në 100 dollarë në fund të vitit.
Si një prej arsyeve të rritjes së çmimeve të naftës, gazit dhe energjisë, Rama përmendi edhe ndryshimet ekstrëme klimaterike, që nga ngrica në Amerikë, përmbytjet në Evropë apo temperaturat e larta, në Indi e gjetkë.
Rama paralajmeroi mes të tjerave një rritje të çmimit të energjisë në vend, e po ashtu një përpjekje të qeverisë për të ndihmuar shtresat në nevojë, familjarët dhe biznesin e vogël.
Kujtojmë që një fjalim po kaq të ngjashëm dramatik, Rama e mbajti edhe në fillim të pandemisë së kovid-19, duke e cilësuar atë çka do pasonte një luftë e mirëfilltë, pas të cilit u shfaqën tanket për të ndaluar njerëzit të dilnin rrugëve e të përhapnin virusin e kovid-19.
