Ashtu siç kishte njoftuar në fejsbukun e tij, kryeministri Rama ka sqaruar përballë opinionit publik, pozicionin e shtetit (dhe filozofinë e tij qeverisëse), përballë ngjarjes së ndodhur më 8 dhjetor 2020, mëngjesin e së cilës u godit për vdekje 25 vjeçari Rasha, nga një efektiv i policisë.
Në komunikimin e tij publik, Rama pohoi se ministri Lleshaj “i kishte vënë në dispozicion dorëheqjen qysh sa kishte ndodhur ngjarja”, dhe se ai ishte shumë krenar për qëndrimin e tij.
Ndërkohë, Rama lavdëroi punën e policisë, e cila, siç edhe përmendi shpesh, “nuk është e pushtetit, por e shtetit”, duke theksuar se ajo është tashmë shumë më e mirë se e shtatë viteve më parë, e se në radhët e saj nuk ka më të korruptuar.
Në sytë e kryeministrit, episodi me djaloshin Rasha është i izoluar, dhe policia e shtetit, edhe pse ka vuajtur shpesh dhunë nëpër protesta, ka ditur të jetë sërish e balancuar, duke mos i shërbyer në asnjë çast pushtetit, por vetëm ligjit.
“Dua tu them efektivëve të policisë”, shtoi ai, “që të ndihen krenarë për uniformën dhe për shërbimin ndaj popullit dhe vendit të tyre”.
