Kjo pulë këtu poshtë (i kërkoj falje që e marr si shembull) është një pulë e zakonshme si gjithë të tjerat. Thjesht bën vezët, por edhe ato i bën jo se ka ndonjë meritë personale, por sepse nuk mund të mos i bëjë. Ajo është e mirë, por megjithatë as nuk e di që ato që ajo bën, vezët, pra kanë aq vlerë për njeriun. Por, ne njerëzit kujtojmë që çdo gjë që ka vlerë për ne, ka vlerë universale.
Pula nuk i bën vezët për ne sikundër thonë përrallat, librat e leximit, abetarja, ose rrëfimet e gjysheve. As nuk i rruhet fare se ku shkojnë vezët e saj!
Sa mirë që pula nuk e di sa të vlefshme janë vezët e saj për ne, sesa shumë varemi prej saj çdo mëngjes, sepse me siguri pastaj do ta kishim pësuar shumë rëndë. Do të na kërkonte ndofta të paguanim taksa që ajo të mbante dy a tre bodigardë, të kishte makina luksoze, të jetonte në vila që i paguan shteti dhe të tilla privilegje si këto.
Madje do të thoshte që përse mos kem edhe unë si deputetët pension të përjetshëm të privilegjuar, telefon falas, lekë shërbimesh pa fund, etj.
Kjo pulë sot është në punë të vet por duke marrë 2100 like nga ne brenda disa orësh, ajo tani do të ketë të drejtë të krenohet në kotecin e saj duke u thënë pulave të tjera se marrëdhëniet me gjelin do t’i mbajë këtej e tutje vetëm ajo. Ajo është pula më e votuar në Shqipëri, pavarësisht se nuk ka asnjë meritë për këtë. Jemi ne që për një arsye apo një tjetër i kemi dhënë këtë fuqi, e kemi bërë të besojë se është ndryshe nga pulat e tjera, a thua se ajo e bën vezën e kuqe kurse pulat e tjera e bëjnë vezën normale.
Ne i kemi dhuruar kësaj pule pushtetin që ajo tani do të ushtrojë mbi pulat e tjera, edhe mbi vetë gjelin. Gjeli duke parë sondazhin tulatet dhe kërkon pak edhe të përfitojë duke menduar se distancimi nga pulat e tjera dhe privilegjimi i kësaj pule do t’a bëjë edhe atë të famshëm, kështu edhe ai ushtron pushtetin mbi pulat e tjera. Eshtë gjeli i pulës më të famshme në Shqipëri në facebook.
Pula kujton padyshim se e kanë votuar për meritat e saj, por besoj se i janë errur sytë, meqë mjafton të shohi pak më mirë në qymez dhe do të vejë re që të gjitha pulat bëjnë njësoj vezë. Hanë misrin që u hedh i zoti, bëjnë njësoj glasa, kakarisin njësoj.
Ne ia thamë like për faktin e psikologjisë sonë, por ajo votën tonë e përdor tani sipas interesit të saj. Ti pula atje, i thotë njerës, të kam caktuar ambasadore te oborri i komshiut, ti tjetra, fshije pak kotecin, ju atje, mos kakarisni shumë, por ngohni vezë sepse na duhet ta shtojmë prodhimin e zogjve, ju ikni për krimba!
Ne ja dhamë votën për hallin tonë, ca sepse na ka marrë malli për fshatin, ca sepse janë ekologjistë, ca se jemi zemërmirë dhe na vjen keq për qeniet e gjaalla, ca sepse fundja se mos humbën gjë. Por, edhe sepse nga pak jemi zemërpula!
Puna është se tani kjo pulë që pushtetin tonë e ka të falur kërkon që ta besojnë se edhe në jetën reale është si në fotografi. Kërkon t’i ngjajë fotografisë që i kanë bërë, identifikohet me imazhin që ne vetë i kemi dhënë. Cfarë belaje!!! Ne e trajtojmë si miss pula, ajo pastaj sillet me ne si miss dhe na trajton nga lartësia e saj si miss. Ajo idealizon veten sepse kur e sheh veten në pasqyrë, pasqyrë që është vështrimi ynë, sjellja jonë, vota jonë për të, i duket shumë e lartë dhe nuk ka më sy ta shohi veten se kush është realisht.
Bota e saj përmblidhet te ato gjëra që ajo sheh. Krimbat e tokës që çukit i japin ndjenjën e gjithëfuqisë, veza që bën i duket e artë sikur mbi të është ulur i gjithë njerëzimi, kakarisjet e pulave të tjera i duken si një korr votuesish a mitingashësh që brohorasin për të, kakarimën e saj kur pjell vezën padashje e dëgjon si një sinfoni qiellore, koteci i duket sikur është i gjithë universi, vetë dielli i duket si një e verdhë veje që i ka plasur lëvozhga.
Tani në kotec ka rënë qetësia. Pula është imponuar! Mua më kanë votuar njerëzit, shkruhet në pendët e saj, ju pula të tjera jeni asgjë para meje. Dhe pulat e tjera kënaqen edhe ato, u lartësohet mendimi për veten, janë të lumtura që kanë jetuar, pjell vezë, kakarisur si bashkëhose e pulës që nuk e dallon veten nga fotografia që i kanë bërë njerëzit.
Pula fotozhenike do të fillojë as të mos bëjë më vezë. Shumë e dhimbëshme. Dy pula që në mëngjes i sjellin vezën që e ka bërë një pulë tjetër, ja fusin nën pupla dhe ajo kujton se tanimë edhe vezën e bën pa dhimbje. Madje si ajo vezë mund të bëjë cdo një orë.
Pulat e tjera e besojnë. Në të gjithë pulat e fshatit mori dhenë lajmi se atje tej është pula që bën 24 vezë në ditë. Foto të tjera! Kakarisje të tjera! Pula e beson sepse shërbyeset e saj tani as nuk guxojnë t’i thonë se vezët ndënë shalë ja fusin ato çdo gjashtëdhjet minuta. Pula identifikohet me foton e vet jo sepse mashtron, por e beson sinqerisht këtë. Nuk e di se përse është ndryshe nga të tjerat. Di vetëm që nuk është si ato.
Atje tej, pronari i qymezit qesh! Shet vezë dhe qesh!
I duhet pikërisht një pulë që i ngjan fotos që i kanë bërë. Imagjino sikur pulat ta marrin vesh se vezët e tyre ne njerëzit i hamë, do te na kishin kërkuar që ta paguanim vezên sa frëngu pulën. Imagjino sikur pulat ta marrin vesh se vezët e tyre i shesim, do të na kishin taksuar rëndë.
Më mirë të kakarisin me njera tjetrën në qymez dhe mos kenë kohë të mendojnë!
