Nga Albana Nexhipi Lekaj
Studiuesja Italiane Olimpia Gargano ka realizuar më në fund botimin e plotë të veprës “Scanderbeiade” të Margherita Sarrocchi-t (1623), e cila do të prezantohet në Amalfi të Italisë, përmes një konference e cila e vë theksin tek gjurmët e kohës së Skënderbeut në këtë zonë.
Dy fjalë për autoren Sarrocchi
Me origjinë nga Gragnano dhe aktive në rrethet akademike të Romës të shekullit të 17-të, Sarrocchi qe një njohëse e figurave të tilla si Galileo Galilei, Giambattista Marino, Alessandro Tassoni dhe Giambattista Manso. “Skënderbeiada” e saj, kushtuar heroit kombëtar shqiptar Gjergj Kastriot Skënderbeu, ka mbetur prej kohësh një vepër e vështirë për studiuesit dhe lexuesit.
Botimi i Amalfit – redaktuar nga Olimpia Gargano me një hyrje nga Matteo Mandalà – do të ofrojë për herë të parë tekstin e plotë me përmbledhje, analiza dhe një aparat kritik, projektuar për një audiencë bashkëkohore.
Prezantimi zyrtar i vëllimit do të mbahet të premten, më 21 nëntor, në orën 9:00 të mëngjesit, në Salone Morelli të Bashkisë së Amalfit, në hapje të Konferencës Ndërkombëtare “Në gjurmët e Skënderbeut. Itinerare Kastriotiane dhe Kultura Arbëreshe në Italinë Jugore” një konferencë kjo që do të shqyrtojë kontekstin e pasur gjeokulturor, që mori formë në Italinë Jugore pas migrimeve shqiptare pas vdekjes së Skënderbeut (1468) dhe pushtimit osman të Shqipërisë.
Festimet e pesëdhjetëvjetorit do të përfundojnë të shtunën, më 22 nëntor, me një aktivitet të dyfishtë kushtuar rizbulimit të gjurmëve kastriotiane në zonë.
Mandej, në orën 16:30, duke filluar nga Piazza Duomo, pjesëmarrësit prirë nga vetë prof. Gargano, do të ndëmarrin një udhëtim për të zbuluar vendet me origjinë kastriotiane në Amalfi, duke ofruar një mundësi unike për të mësuar rreth trashëgimisë kulturore lënë në zonë nga diaspora shqiptare.
