Përgjatë takimit në ditën e sotme me rektorët e universiteteve publike dhe private, kreu i qeverisë Rama e ka vënë theksin edhe tek pakësimi i universiteteve gjeneraliste në end, në favor të atyre të specializuara.
Nuk mundemi ne, tha Rama, një vend kaq i vogël, që sado potenciale të kemi mbetet prapë i vogël, që të kemi në gjithë territorin e vendit universitete gjeneraliste, që i bëjnë të gjitha, dhe që për shkak të faktit se bazohen tek nevoja pëp financim të drejtë përdrejtë, shtojnë ujë e shtojnë miell, duke shtuar faktikisht mediokritetin e duke i hequr vetes mundësinë të jenë ekselenca në një drejtim, e jo në të tëra. Ne po humbasim vite në pritje që universitetet ta bëjnë këtë, por nuk e bëjnë dot për shkak se janë të kushtëzuar nga konjuktura të brendshme. Duhet të bashkëpunojmë që, pa i hequr asgjë askujt, të krijojmë kushte që të gjithë të përfitojnë më shumë, duke u bërë shumë më tepër tërheqës, qoftë për tregun e brendshëm, qoftë për sistemin arsimor ndërkombëtar. Pyetja me të cilën përballemi më shpesh ndërkohë që përpiqemi për ndërkombëtarizimin është: pse ky universitet bën tërë këto gjëra, duke pasur një gjeografi kaq të ngushtë? Dhe duke pasur një territor që është i qartë që mund të profilizohet në dy- tre drejtime, se sa hapët në të gjitha drejtimet. Pse duhet të ketë juridik në të gjithë Shqipërinë, pse duhet të ketë infermieri në të gjithë Shqipërinë, dhe me këtë ne duhet të përballemi, tha mes të tjerave Rama.
Kujtojmë që biseda e Ramës vjen në kontekstin e një proteste masive prej pedagogëve në vend, të cilët këmbëngulin në rritjen e pagës deri në 50% për dy vjet, duke bojkotuar edhe mësimdhënien aktualisht, kur sapo ka nisur edhe viti i ri akademik.
