“Janë arrestuar të mitur dhe kalimtarë të rastit”. Ky është përfundimi i Avokatit të Popullit, pasi ka inspektuar disa komisariate dhe qendra shëndetësore gjatë protestës, shpërthyer për vrasjen e djaloshit Klodian Rasha nga një efektiv i Policisë.
Në njoftimin publik bërë prej institucionit të Avokatit, thuhet se gjatë këtij inspektimi, është parë se “numri i të shoqëruarve ka qenë i lartë: 124 persona, nga të cilët 57 të mitur, […] që janë lënë të lirë pas verifikimit të tyre dhe në momentin e inspektimit janë gjendur vetëm 2 të mitur të arrestuar, njëri 16 vjeç dhe tjetri 17 vjeç.
Sipas këtij raporti, gjendja e të shoqëruarëve nëpër komisariate ka qenë:
Në Komisariatin nr.3 – shoqëruar 13 të mitur të cilët ishin lënë më pas të lirë, pas kryerjes së procedurave. “Këtu mbaheshin 5 persona të arrestuar, nga të cilët njëri paraqiste probleme shëndetësore të karakterit mendor. Personat mbaheshin në kushte të papërshtatshme për ruajtjen e shëndetit të tyre, pasi kapaciteti në këtë Komisariat ishte vetëm për 3 persona. Në këtë komisariat, rezultoi se për asnjë person nuk ishin plotësuar kartelat mjekësore.”
Në Komisariatin nr.1 situata më komplekse për shkak të numrit masiv të të shoqëruarve. “Qenë shoqëruar fillimisht rreth 50 persona, nga të cilët 24 të rritur dhe 25 të mitur, këta të fundit, pa raport shërbimi. Të miturve u ishin marrë gjeneralitetet dhe ishte komunikuar me prindërit.”‘Gjatë momentit të inspektimit në dhomat e shoqërimit dhe ndalimit në Komisariatin nr.1 ishin 16 persona, nga 6 persona që ishte kapaciteti.
Në Komisariatin e Policisë Nr.2, shoqëruar 38 persona, 10 prej të cilëve nën moshën 18 vjeç.
Në Drejtorinë Vendore të Policisë Tiranë, në datën 10.12.2020,qenë shoqëruar 17 veta, 9 prej të cilëve nën moshën 18 vjeç. Këta të fundit janë lënë të lirë një orë pas shoqërimit.
‘Ky është një numër disa herë më i lartë se kapacitetet e shoqërimit dhe ndalimit në drejtoritë vendore dhe komisariatet e kryeqytetit, vazhdon në njoftimin e tij Avokati i Popullit, të cilat kanë mundësi akomodimi vetëm për 33 të shoqëruar dhe rreth 25 të arrestuar. Këto janë kapacitetet në gjendje normale, pa marrë në konsideratë masat shtesë të distancimit për shkak të emergjencës shëndetësore. Në momentin e inspektimit ka pasur në total një numër prej 52 të arrestuarish. Dhomat e sigurisë ishin të pajisuara me dezifektantë dhe në disa prej tyre kishte maska por nuk ishin në numer të mjaftueshëm për ta. Nga të ndaluarit, pati vetëm një numër të kufizuar pretendimesh për veprime të dhunshme nga ana e punonjësve të Policisë por nuk pati ankesa formale të paraqitura për të mundësuar më tej hetimin e institucionit tonë.
Raporti thekson se mes të shoqëruarëve kishte pasur edhe të mitur nën 14 vjeç, dhe se procedurat për shoqërimin e tyre do hetohen më tej.
Nërkaq, po sipas këtij raporti, të arrestuarit janë intervistuar për veprimet e tyre, dhe një pjesë e mirë kanë deklaruar se kanë qenë kalimtarë të rastit, që nuk po merrnin pjesë në protestë.
