Ka mbërritur më në fund në vendlindjen e krijuesit të saj, një prej kryeveprave të letërsisë botërore për fëmijë, ajo me titull “Princi i vogël”, shkruar 80 vite të shkuara, prej shkrimtarit francez Antoine de Saint-Exupery.
Novela e njohur u shkrua prej shkrimtarit gjatë Luftës së Dytë Botërore, teksa ai ndodhej në Nju Jork, dhe aktualisht, 30 faqe të dorëshkrimit origjinal, gjenden në Muzeun e Arteve Dekorative, në Paris.
Por dorëshkrimi origjinal i Princit të Saint-Exupery-së nuk është i vetmi në këtë muze. Ai gjendet aty së bashku me qindra sende të tjera të autorit, që përshfaqin edhe shumë anë të tjera të jetës dhe veprës së tij, e ku përfshihen mes të tjerave edhe skica, vizatime, fotografi, poezi, copëza gazete apo pjesë nga letërkëmbimi i tij.
Ekspozita mban emrin “Një takim me Princin e Vogël”, dhe është ndërmarrë si iniciativë prej stërnipit të Saint-Exupery, Thomas Rivière-së.
Ka qenë ëndrra ime për shumë kohë, rrëfen Thomas Rivière për mediat e huaja. Kjo ekspozitë titullohet “Një takim me Princin e Vogël”, dhe qëllimi është që të takohet vërtet Princi i Vogël”.
I lindur në qytetin france të Lionit më 1900-n, Saint-Exupery qe shkrimtar i kohës, pilot e gazetar, i cili iu bashkua aviacionit francez më 1940-n. Po atë vit fluturoi drejt Nju Jorkut me misionin për të bindur Shtetet e Bashkuara të bëheshin pjesë e luftës, e të luftonin krah Francës. Teksa ndodhej në Shtetet e Bashkuara, Saint-Exupery mbaroi së shkruari edhe “Princin e vogël” (Le Petit Prince), i cili u botua në Nju Jork më 1943-in, si në anglisht, ashtu edhe në frëngjisht.
“Princi i vogël” ka njohur një sërë botimesh edhe në kontekstin libror shqiptar, duke u bërë ashtu si në tërë botën, një libër i dashur dhe me shumë mesazhe për të gjitha brezat në Shqipëri.
