Gara në PD, se kush do të garonte përballë Veliajt në vendoret e 14 majit 2023, është mbyllur ditën e djeshme me një shtrëngim duarsh, mes dy kandidatëve që kishin marrë më shumë vota prej demokratëve, Ilir Alimehmetit dhe Belind Këlliçit.
Në konferencën e dhënë së bashku nga selia e PD-së, Ilir Alimehmeti u shpreh se njihte humbjen përballë Belind Këlliçit e se do të vazhdonte të bashkëpunonte me PD-në për fitoren vendoreve të 14 majit 2023.
“Më duhet të theksoj se që prej fillimit të procesit, kam qenë gjithmonë i bindur se ishte anëtarësia ajo që duhej të shprehej dhe nuk duhej të tejkalohej nga vota e simpatizantëve”, tha mes të tjerave Alimehmeti, “edhe pse kam pasur vërejtje për këtë. Kam qenë gjithmonë i bindur se duhej të ishte anëtarësia ajo që duhej ta kishte këtë rol dhe kështu qe. Dhe aëtarësia foli. Foli në favor të kandidatit këtu pranë meje, Belind Këlliçi, djalë i shkëlqym, bashkëshort i devotshëm. Të njohësh votën është shenja e parë e qytetarisë. Do vazhdoj të punoj me ju kundrejt fitores së datës 14 maj 2023.”
Ndërkaq Këlliçi deklaroi se kjo garë e vendore për kreun e Bashkisë së Tiranës, kësaj radhe do t’u shëmbëllente disi garave presidenciale amerikane, ku ai që fiton, mban tërë kohës pranë ndihmësin e tij, duke u thënë se nëse ai fiton përballë Veliajt, Alimehmeti do të bashkēqeverisë Tiranën bashkë me të, si nënkryetar i Bashkisë Tiranë.
“Jam i sigurt që ky është një ogur i mirë”, tha Këlliçi, “jam krenar që kam qenë pjesë e këtij procesi, e procesit të primareve në PD, organizuar për herë të parë me këtë standard. E për ta çuar edhe një standard më tutje e për të sjellë një risi në skenën politike shqiptare, ne sot publikisht, do të adaptojmë një model amerikan të garës, modelin e garimit presidencial, ku të gjithë shikuesit e dinë se në SHBA, kur zhvillohen garat, garon kandidati për president, së bashku me krahun e tij djathtë, kandidatin për zëvendëspresident. Unë kam kënaqësinë sot, gjithnjë kam pasur bindje se do ta mundja Erion Velinë po t’ia dilja kësaj gare, por sot nuk jam më unë, jemi ne. Së bashku me doktor Ilir Alimehmetin si krahun tim të djathtë në këtë fushatë deri në 14 maj, dhe pas 14 majit, si nënkryetarin e Bashkisë së Tiranës, jam i bindur se çdo qytetar i Tiranes do të ketë shumë më shumë arsye për të na votëbesuar”, deklaroi mes të tjerave Këlliçi, i cili nuk harroi të falënderonte në fund të fjalës së tij, 8470 demokratët që dolën për të votuar e po ashtu edhe komisionerët, vëshguesit e degët e PD-së, duke e cilësuar standardin e mbërritur prej primareve, si një standard të ri për politikën shqiptare.
