Një qytetare e indinjuar për shkak se nuk ka lidhur dot biçikletën e saj në një nga shtyllat e një prej shesheve në Tiranë, ka rrëfyer shqetësimin e saj me gjasa të përbashkët për shumë qytetarë që ngasin biçikleta në Tiranë, pra mungesën e parkimeve të tyre shumëkund.
Qytetarja rrëfen se teksa ishte përpjekur ta lidhte biçikletën e vet pranë shtyllës së institucionit ku ajo punon, polici e ka ndaluar ta bëjë një gjë të tillë, duke i thënë se nuk lejohet. Mirë do të ishte që Bashkia Tiranë ta sqaronte edhe këtë pjesë me punonjësit e policisë, sepse teksa kreu i saj Erjon Veliaj përpiqet të ndërtojë një kulturë biçikletash në kryeqytet, duhet t’u mundësojë edhe atyre që ngasin biçikleta edhe parkingjet e tyre.
Sa më poshtë, historia e rrëfyer prej vetë qytetares
Mjerisht sheshi nuk është më i qytetarit, ose është i qytetarit me hope…Lidh biçikletën, ku e lidh përditë, para institucionit, në një shtyllë si 100 të tjera para dhe pas meje… në pamundësi për ta sistemuar diku tjetër. Vjen polici: shtylla nuk është për bicikleta. I vë në dukje që të gjitha shtyllat janë të zëna me biçikleta… Ok, i bindem. E marr sipër nga nervat, por roja me uniformë e ndërtesës fizike, që shpesh e ngatërron veten me rojtar të njerezve dhe të vullneteve, më vë ne dukje pushtetin e tij (në lidhje me biçikleten). Ia çoj në djall pushtetin, me fjalë të qarta të regjistrit te tij (se veç kështu besoj kupton). Rezultati: humbas qetësine time.
Por bini dakord! Nëse në shtyllat e sheshit nuk lidh dot biçikleta, nuk mund të bësh dot as panaire frutash perimesh e bagëtish e ruralizma të tille lotshkulës. Nuk mund të instalosh skena koncertesh për disa “yje” disa qindra mijëra eurosh, anonime. Për pritjen e këtyre sheshi gumëzhin nga provat e ulërimat disa ditë para dhe disa ditë pas, ndërkohe që në pak cm më tutje jan Rektorati, Muzeu Arkeologjik, Akademia e Studimeve Albanologjike dhe Akademia e Arteve. Thuajse cdo dite të Zotit, fasada e këtyre institucioneve është e rrethuar ose e mbuluar prej gjithëfarelloj aktivitetesh folklorike. Oh po, unë besoj se biçikleta ime e meriton të lidhet në shtyllë, me keqardhje për bicikleten që meriton diçka më shumë. Ose dita pa makina është krejt hipokrizi…
