Lojtari i Juventusit, Paul Pogba, rrezikon të përjashtohet për katër vjet nëse dyshimet për përdorim dopingu gjatë ndeshjeve vërtetohen. Nga sa thuhet deri më tani, Pogba ka rezultuar pozitiv me testosteron ditën e parë të kampionatit më 20 gusht, gjatë ndeshjes Udinese-Juventus.
Pogba u përdor nga Max Allegri ditën e dytë të kampionatit, në ndeshjen Juventus-Bologna (1-1), kur hyri në fushë në minutën e 21 të pjesës së dytë dhe në ndeshjen Empoli-Juventus, ditën e tretë të kampionatit, kur doli në fushë në minutën e 16-të të pjesës së dytë, duke e mbyllur ndeshjen me një problem të lehtë muskulor.
Sipas mediave italiane, mesfushori i Juventusit tani do të ketë tri ditë kohë për të kërkuar një kundëranalizë, e nëse del sërish poitiv, atëherë lojtari francez do të gjykohet nga Gjykata Kombëtare e Antidopingut. Përjashtimi zgjat deri në dy vjet, por mund të shkojë edhe katër nëse vërtetohet qëllimshmëria. Ndërkohë, Gjykata Kombëtare e Antidopingut e ka pezulluar përkohësisht lojtarin, duke bërë të ditur se nga analizat është konstatuar prania e “metabolitëve të testosteronit me origjinë jo endogjene”.
Capua (FIGC): “Sistemi i kontrollit funksionon”
Presidenti i Antidopingut të Federatës Italiane të Futbollit, Capua, ka deklaruar se sistemi I tyre I kontrollit është më I mirë, dhe ka pak gjasa që të ketë bërë gabim. “Megjithatë”, theksoi ai, “shpresoj që çështja që ka të bëjë me Paul Pogbën të sqarohet sa më shpejt në interes të lojtarit.”
Fjalët e Pogbe-s: “Futbolli është mizor, por nuk do të dorëzohem kurrë”
Vetëm pak orë më parë, në një intervistë për rrjetin “Al Jazeera”, Pogba ishte shprehur për vështirësitë e hasura vitet e fundit (për shkak të lëndimeve të vazhdueshme) dhe dëshirën e tij për t’u hakmarrë: “Doja të ndaloja. Paraja ndryshon njerëzit. Mund të shkatërrojë familje. Mund të krijojë luftë. Ndonjëherë mendoja: “Nuk dua të kem më para. Thjesht nuk dua të luaj më. Unë thjesht dua të jem me njerëz normalë, kështu ata do më duan për këtë që jam, jo për famën, jo për paratë. Por ndonjëherë është e vështirë”. Më pas mesfushori reagoi ndaj atyre që e kishin kritikuar për paraqitjet e tij në fushë: “Dua t’i bëj të hanë fjalët e tyre. Dua t’u tregoj se nuk jam i dobët. Ata mund të flasin keq për mua, por unë nuk do të dorëzohem kurrë”, shprehet ai, teksa thekson se “futbolli është shumë i bukur, por mizor, e njerëzit mund të të harrojnë kollaj. “Bën vërtet dicka të madhe, por të nesërmen mund të mos jesh askush”, është shprehur Pogbe.
Reagimi i Juventusit: “Jemi duke vlerësuar hapat e ardhshme proceduriale”
Ndërkaq klubi i Juventusit ka reaguar duke theksuar se është në pritje të hapave të tjera proceduriale dhe i predispozuar për t’i vlerësuar ato. “Klubi i Futbollit Juventus njofton se sot lojtari Paul Labile Pogba mori urdhrin e pezullimit paraprak nga Gjykata Kombëtare Anti-Doping, pas rezultatit negativ të analizave të kryera më 20 gusht 2023. Kompania rezervon të drejtën të vlerësojë hapat e mëtejshëm procedural.” , thuhet në një shënim të Juventusit.”, thuhet në deklaratën e tyre.
