Metropolpost: Në kujtesën time ti je një djalë i ri, shumë i ri që i bie saksofonit. Për të tërë ata që e lexojnë për herë të parë emrin Ermal Rodi, a mund t’u thuash dy fjalë? Kur të lindi pasioni për muzikën? Si e zhvillove atë, cilat janë ëndrrat e tua në këtë drejtim?
Ermal Rodi, saksofonist/ Tashmë, edhe pse i ri relativisht në moshë, unë me muziken kam një lidhje të gjatë, që në shkollën fillore e më pas deri në universitet. Gjithmonë muzikë dhe instrumentin tim saksofonin. Kurse muzika xhaz e ka pushtuar qenien time në adoleshencë, pasi dëgjoja muzikë rrok&rroll, dhe kur kërkon diçka më shumë në muzikën e sotme sidomos, është muzika xhaz stacioni, frekuenca dhe energjia e duhur intelektuale.
Sa për ëndrrat e mia në karrieren time, krijimi është e vetmja gjë që më motivon…krijimi në muzikë.
Metropolpost: Kohët e fundit të kam ndjekur në disa koncerte brenda dhe jashtë vendit. A mund të na përmendesh disa prej vendeve ku ke luajtur së fundmi dhe koncertet që ke dhënë?
Ermal Rodi, saksofonist/ Me shumë kënaqësi isha bashkë me kolegët e grupit “Albanian jazz society band”, ku unë jam solisti, kompozitori në pjesë të ndryshme të repertorit si dhe bashkë themelues me Gent Rushin. Filluam një turne në Francë, Zvicër dhe Greqi në xhaz festivalet e qyteteve kryesore. Të ishe pjesë e këtyre skenave të mëdha është kënaqësi me vete!
Metropolpost: A ka sipas Ermal Rodit një identikit audienca shqiptare, publiku shqiptar? Çfarë pëlqen në gjykimin tënd më shumë publiku shqiptar?
Ermal Rodi, saksofonist/ Publiku shqiptar tashmë pëlqen dhe ka lëvruar gjithçka dhe nuk mungon as në rastin e muzikes xhaz, janë duke e njohur edhe atë dhe është në një fazë gjithmonë e në ngritje.
Metropolpost: A do t’ua sugjeroje të pasionuareve pas saksit ta ndiqnin këtë karrierë? A ka të ardhme për saksofonistët në Shqipëri e në botë?
Ermal Rodi, saksofonist/ Sigurisht që po, do ishte këshilla më e bukur që do t’i jepja dikujt, por ky instrument (saksofoni), të bën për vehte sido të jetë…është një oaz tingulli që rritet e rritet brenda teje si një pemë me rrënjë të thella, me gjethe, e bukur…
Metropolpost: A bëhet dallim jashtë mes artistëve shqiptarë dhe artistëve nga vendet e tjera. A ndihet në art paragjykimi “janë shqiptarë”?
Ermal Rodi, saksofonist/ Ajo që vihet re këto vitet e fundit, është që ka etje për muzikën shqiptare të nderthurur me rryma të ndryshme muzikore, si ajo xhaz dhe për publikun europian sidomos, kanë shumë kuriozitet dhe jo paragjykime.
