Kanë reaguar duke e kthyer mbështetjen e tyre në një sfidë onlajn, me mijëra njerëz përkrah profesorit të biologjisë në Kosovë, Lulëzim Paci, i cili kërcente valle tradicionale në shtëpinë e vet dhe i hidhte në Tik-Tok.
Teksa është akuzuar fillimisht nga deputetja e Vetëvendosjes, Fjolla Ujkani për sjellje “të pahijshme e degjeneruese”, duke kërkuar dhe marrjen e masave ndaj tij, vetë Vetë Paci, në një intervistë për KTV_në Kosovë, në emisionin SOT, ka deklaruar se viraliteti i kërcimeve të tij tradicionale, e ka vënë në siklet me familjen, nënën e vëllezërit.
U kam thënë vëllezërve të mos thonë që janë vëllezërit e mi, është shprehur ai mes lotëve në emision, duke rrëfyer po ashtu se si i ka shpjeguar të ëmës plakë, tronditur nga fjalët e këqija për të birin në atë moshë, se nuk kishte bërë gjë tjetër, veçse kishte kërcyer vallet që kërcenin nëpër dasma dikur, e i kishte hedhur në rrjet.
Pas deklaratave të profesorit, rrjeti është mbushur me njerëz që e imitojnë atë, duke kërcyer valle tradicionale shqiptare, ndërkohë që deputetja e Vetëvendosjes Ujkani ka kërkuar ndjesë për reagimet e ashpra ndaj videove të profesorit, duke theksuar se e ka bërë këtë si një ish-gjimnaziste e asaj shkolle, me qëllimin e mirë për të ruajtur besueshmërinë dhe seriozitetin e saj.
Unë, para se të jem deputete, kam qenë gjimnaziste e të njëjtës shkollë, pra kam reaguar si një ish gjimnaziste, shprehej ajo në ndjesëne saj. Reagimi im ka pasur për qëllim mbrojtjen dhe mirëqenien e nxënësve, dhe gjithsesi ruajtjen dhe mbrojtjen e kredibilitetit të shkollës, është shprehur ajo, duke kërkuar që reagimi i saj të mos përdorej për sulme politike.
