Duket habi në fakt, por dy liderat e dy partive më të madhe në vend, janë në garë edhe për podkastet.
Jo më larg se rreth 10 orë më parë, kreu i qeverisë, Rama, lançoi një fejbukun e vet, rubrikën podkast ‘Flasim’, ndërkohë që sot, Berisha, po në rrjetin e tij social deklaron se edhe ai do të nisë një podkast, por me titull ‘Jeta përtej politikës’
‘Mirëmëngjes, dhe me disa fjalë për Podkastin tim, FLASIM, që së shpejti do të hapë siparin për të ftuarit, ju uroj një javë të mbarë‘, shkruan Rama thuajse 10 orë më parë, duke bashkëngjitur edhe videon sa më poshtë
Ndërkohë që thuajse përpara 30 minutash, Berisha bëri të njëjtin njoftim:
‘Të dashur miq të komunitetit të madh të rrjeteve sociale Facebook’, shkruan Berisha, ‘Instagram dhe Tik Tok. Që prej dhjetorit, kam në ‘sirtarin’ tim dixhital të komunikimit me ju, edhe podcast-in tim të përjavshëm. Ngjarjet e kanë shtyrë këtë takim të ri me ju në një format tjetër, por duke filluar nga sot do të shihemi edhe në këtë dritare të re. Mora vesh se edhe Edi Rama do ketë podcast. Si gjithmonë disa hapa pas meje, por ju e dini se unë kam një pasion të veçantë për teknologjinë dhe risitë e saj. Kam menduar që komunikimi me ju në podcast të përqendrohet kryesisht në çështje jo politike, në Sali Berishen qe ju nuk e keni njohur dhe këtë e provon edhe ky episod i parë, i regjistruar në dhjetorin e kaluar. Meqë Rama paska thënë se është gati që të debatojë edhe me kundërshtarin politik, një ftesë që unë ja kam bërë prej kohësh në studiot televizive, ia përsëris tani publikisht, që ta bëjmë debatin të cilit ai i shmanget. Ku të dojë ai, në podcast-in tim apo të tijin. Mendoj se politikanët duhet të ballafaqojnë pikëpamjet e tyre. Uroj të gjejë kurajo dhe të pranojë ftesën time. Këtu mund të ndiqni videon dhe audion podcast, https://rss.com/podcasts/saliberisha/’, vijon Berisha, edhe pse data e podkastit rezulton 3 prill 2023.
Nuk dihet ende se si do të reagojë Meta, ndaj kësaj sjelljeje të dy liderëve më të rëndësishëm në vend, por gjasat janë që edhe ai, ta ndjekë këtë modë të re, në lëmin e komunikimit onlajn me publikun.
