Në rast humbjeje të Partisë Demokratike në 11 Maj, Sali Berisha duhet të largohet përfundimisht, horizontalisht dhe vertikalisht nga drejtimi dhe pushteti mbi të. Asnjë justifikim nuk do të mbante më ujë.
PS me një krah të thyer
Partisë Socialiste sapo i kanë bllokuar makinën më të fortë elektorale në Tiranë. (Nuk e di nëse në hetimet e SPAK janë futur dy dasmat e dikurshme të kryebashkiakut, por mirë do ishte të kishte ndonjë shpjegim dhe për to, sepse njerëzit, duan llogari jo vetëm për korrupsionin, përfitimet e abuzimet, por edhe për arrogancën). Së bashku me Erion Veliajn, bie, apo tronditet fort, një ndër strukturat kapilare më të forta elektorale. Vërtetë mund të supozohet me mbështetje monetare të fortë, por edhe paratë duan strategji.
Kryesocialisti me degë të krasitura
Vetë Edi Rama, motori 5000 kuajsh që tërheq prej kaq vitesh PS, nuk është aq komod sa duket. Është pothuaj i krasitur. Po ta shihni me vëmendje nuk ka asgjë socialiste në qeverinë aktuale me përjashtim të ndonjë Taulantballe periferik. Me ç’duket ajo mburrja se ishte ai që këmbënguli për drejtësinë e re dhe për mbështetjen e SPAK duhet riparë. (Në një vend normal që synon standartet e BE, kryetari i qeverisë dhe i partisë që i shkojnë në burg e në hetim e i arratisen eksponentët kryesorë, nuk pretendon se po i hanë fiq pas shpine, por merr përgjegjesi me dorëheqje, të paktën nga qeveria dhe shkon në votbesim popullor pa fuqinë egzekutive).
Pak Tramp në PD
Gjithsesi duke u kthyer tek Berisha, ai prezantoi edhe një emër që do të marrë në dorë fushatën e PD, e që na paskësh ideuar edhe fushatën e Trampit. Kam pak dyshime për këtë, sepse nëse do ishte kaq vendimtar ky dhe jo Elon Musk, apo lodhja e amerikanëve me demokratët, atëherë pse do vinte në Shqipëri zotëria dhe jo në vende të tjera europiane më të mëdha në prag zgjedhjesh, e për të cilat Tramp ka shprehur interes. Mos PD e Berishës e paguan më mirë?!?!
“Efekti domino” i lali Erit
Tronditja e PS me lali Erin, ka shumë mundësi të jetë si rrathët kur bie guri në ujë të qetë, e të përhapet edhe në bashkitë më skajore të PS, kryetarët e të cilave gjithmonë kanë dashur t’i ngjajnë lali Erit. PD do t’i duhet thjesht të përfitojë nga rasti. A do të dijë dhe sa do të dijë, kjo është puna e saj. Por ka shumë
mundësi, se PD nuk do të gjejë më, jo vetëm në Tiranë, por edhe në shumë rrethe bllokun e votave që niste përherë nga “votat e sigurta” që mblidheshin nën hijen e kryebashkiakut (kryebashkiëakëve). Vetëm një tërheqje “frerësh” e fortë e Ramës për të mos lejuar një shkrehje totale, apo një goditje reciproke e SPAK, mund të sjellë qetësi mes socialistëve.
Makineritë elektorale që mungojnë
Po të vëmë një peshore, opozitës i mungon vetëm Ilir Meta, i cili me problematikën e thellë brenda PL, nuk do të ishte ky synonte me votat, por ama sjellja ndaj tij gjatë arrestimit, dhe kontrasti i fortë me shoqërimin prej zotërie të lalit, mund të sjellë më shumë pluse nëse do dijë opozita t’i shfrytëzojë. Në krahun tjetër, PS i mungojnë një sërë eksponentësh elektoralë, madje ndonjë si Ben Ahmetaj me siguri do t’i punojë edhe kundër. Kryetarë bashkish që sfilojnë përditë në SPAK, do të guxojnë pak, ose aspak të marrin përsipër rrezikun e tjetërsimit të votës me premtime, apo blerje (PD duhet ta kthejë në strategji këtë, le të përdorë armët që PS përdori në Himarë).
Neutralizimi i drejtorëve
PD tashmë ka të thjeshtë edhe intimidimin e drejtorëve në qendër e sidomos në rrethe, ata që realisht janë brigadierët që mbushin hambarët e votave për PS. PD sigurisht do të duhet të flasë jo vetëm me gojën e saj, por sidomos me të SPAK, sepse ai është më i besueshëm se Berisha e se gjithë PD; kjo sipas sondazheve. Dhe pothuaj çdo rreth ka drejtorët e tij të rëndëisishëm që kanë pasur punë me SPAK, apo janë duke ngrënë supën e burgut, teorikisht kjo e fundit (derisa SPAK t’u bllokojë edhe të gjitha pasuritë të arrestuarve e të dënuarve).
PD altoparlanti i SPAK
PD e ka akuzuar SPAK për interesat e saj, ndjesë të kryetarit të saj, por deri në 11 Maj ajo duhet të jetë zëdhënësja kryesore e këtij institucioni, altoparlanti i çdo goditje të vjetër a të re, sepse SPAK me dashje, apo pa dashje, po bën “punën e pistë” për PD; po fut në burg (dhe po bën shumë mirë) për korrupsion, por asnjë sqarim për vrasjet politike. Apo ka ndonjë “marrëveshje” tre palëshe dhe qytetarët nuk e dinë?! Gjithsesi duke i zënë vendin PS si përkahëse e SPAK, PD përfiton njëfarë simpatie tek qytetarët. Mos të harrojnë se SPAK i ka bërë “nder” Berishës me ata muaj dënim në katin e tetë për një çështje që as e mbante mend njeri (Shqipëria çdo firmë në këta 30 vjet e ka çështje, me përjashtim të autografëve), ndërkohë që Berisha ka çështje shumë më të mëdha, shumë, shumë më të mëdha për të rrezikuar më shumë se katin e tetë.
E djathta në kundërsulm
Nga matanë Atlantikut dhe nga matanë Adriatikut, fryjnë erëra të djathta. Vërtetë një lider i ri i PD, sot do të ishte ku e ku me vela më të fryra se Berisha, ku e ku më i ftuar e më i pritur në Evropë dhe Botë, ku e ku më me besim e me frymë, por kjo ishte zgjedhje e demokratëve, ta lidhin fatin e tyre dhe të ardhmes së tyre edhe për katër vjet me ringjalljen e tretë të Berishës; por ama erërat janë të djathta, dhe e vetmja që nuk po orientohet dot, është e djathta e Shqipërisë, që gjithë sa mund të artikulojë si politikë të djathtë është heqja e nongratës. Mos vallë e djathta që pretendon prej vitesh Berisha në fakt është e majtë?! Apo është e kompromentuat diku?! Sepse çfarë arsye tjetër ka që ata nuk po shpërthejnë si simotrat që kanë marrë superxhiro ngado.
PS nis e lodhur, PD vetë
mediokre
Fushata që do të nisë shumë shpejt, do të kërkojë një shpenzim të jashtëzakonshëm të PS dhe Ramës për të gjetur shami për të fshirë bojën që u hodhi mbi fytyrë arrestimi familjar i kryebashkiakut, simbolit socialist të Tiranës, fytyrës së kryeqytetit botëror, të ardhmes së PS, motorit elektoral (disa terma përdorur me entuziazëm nga vetë socialistët). Nëse ka gisht dikush nga PS në këtë “ndërhyrje parazgjedhore” është pak e pabesueshme, madje edhe sikur ky dikushi të jetë Rama. E nëse nuk është Rama, nuk ka si të jetë as zëvendësja e tij, ose pastaj kemi kryengritje në Olimp. Por mbetemi tek analiza e fakteve dhe jo konspiracioneve. Fushata e Ramës do të jetë pra e sforcuar, jo vetëm për shkak të lalit, por edhe të tjerëve. Ndërkohë që fushata e PD besoj do të njohë rritje ditore dhe javore. E vetmja që mund ta zbehë fushatën, është lista e deputetëve që ajo do të sjellë para njerëzve. Me gjasë do të jetë një listë mediokre, duke parë sjelljen e një sërë eksponentëve të PD të paktën në dy vitet e fundit. Dhe në krye të zbehtësisë do të jetë vetë Berisha.
Emigrantët, e vetmja votë pa interes
Vota e emigrantëve, unë nuk besoj se do të ketë ndonjë efekt thelbësor në shumicën e rretheve, vetëm nëse të rregjistruarit kalojnë shifrën e 500 mijëve. Kjo shifër mund ta bëjë rezultatin interesant (në gjykimin tim) jo vetëm mes dy partive, por midis shumë partive. Gjithsesi për një arsye, apo një tjetër, më duket se vota e emigrantëve mund të jetë në shumicë kundër pushtetit, jo domosdoshmërisht për PD e aq më pak për Berishën. Emigrantët janë më të ftohtë në gjykim, më të pjekur, e gjithsesi janë ata që e kanë mbajtur dhe e mbajnë gjallë një pjesë të mirë të shqiptarëve me remitanca. Pse do duhej të votonin pushtetin që nuk “i shpëton” nga ky “detyrim”? (Imagjino, Shqipëria nuk e ndalon emigracionin dhe remitancat edhe pasi brezi i parë dhe i dytë i emigrantëve po bëhen gjyshër, por ka edhe më keq, sot emigrimi, ai i vërteti, jo sezonal në Londër, tashmë bëhet familjarisht e në këtë mënyrë humbet edhe mundësia për remitanca). Gjithsesi nëse do kishim mundësi të mësonim si do votonin emigrantët, do të vija bast që pushteti nuk do të merrte shumicën e tyre.
Berisha, sa fat ka ky njeri?!
E nëse, pavarësisht gjithë shanseve që çuditërisht e mrekullisht po anojnë nga PD, apo ndryshe nga ringjallja si kryeministër e Berishës, kjo nuk ndodh, do të ketë vetëm një arsye: pikërisht Sali Berisha. Nëse po, në 12 Maj, ai duhet ta çlirojë pa kthim PD me lirimin e vetes nga kjo detyrë. Asnjë justifikim nuk do pinte ujë. As tjetërsimi votës, as përdorimi administratës, as droga, as ku di unë çfarë mund të thotë. Asgjë. Në të kundërt u bie demokratëve kjo detyrë. E nëse jo, ajo parti do të tretet dhe mund të shohë se si do të rriten me shumë shpejtësi partitë e reja në kurriz të saj. Nga çfarë përfaqëson PD, kjo do të ishte fatkeqësi për politikën shqiptare. E nëse, kundër çdo mundësie, anti çdo logjike të shëndoshë deri pak javë më parë, në shansin për të qenë rast unikal dhe për t’u studiuar në Botë, Berisha me fatin e tij të çuditshëm, shpallet fitues, unë do të ëndërroja për një Sali që për ta shndërruar veten në legjendë siç e duan ithtarët e tij, lajmëron edhe tërheqjen nga politika, nga partia dhe kryeministria. Sigurisht që kjo është ëndërr, mos vini bast për këtë.
