Është ndarë ditën e sotme nga jeta, në moshën 75 vjeçare ish ministrja e Bujqësisë Themie Thomai. Trishtimi për të ka mbushur rrjetin, dhe kanë qenë të shumtë figurat publike, kryesisht të Partisë Socialiste, që kanë shprehur vlerësim për punën e saj ndër vite dhe keqardhje për humbjen e jetës.
Në faqen e tij në fejsbuk, Erion Braçe shkruan se ajo qe “‘një nga vajzat e reja të jashtëzakonshme; 25 vjeç drejtoi një prej ekonomive më të mëdha bujqësore e blegtorale në vend, KËMISHTAJN; 30 vjeç u emërua ministre e Bujqësisë, duke marrë përgjegjësinë e drejtimit të sektorit më kyç të vendit, në prodhim dhe eksport! Kurrë në kaq vite jetë e pune, nuk kam hasur në atë zonë, vlerësim për punën dhe njeriun, drejtuesen e ministren, siç për Themie Thomain;”
Ndërkaq, Petro Koçi e cilëson atë si një personalitet qeverisës në historinë e bujqësisë shqiptare.
Kujtojmë që Themie Thomai, edhe pse me një eksperiencë të gjatë në drejtimin e ministrisë së Bujqësisë në kohën e monizmit, nuk është përfshirë në menaxhimin e sektorit të Bujqësisë, aq problematik gjatë demokracisë, përpos anagazhimit 2-3 viteve të fundit si këshilltare e jashtme në ministrinë e Bujqësisë, drejtuar nga Blendi Çuçi.
