Përmes një monologu bërë publik në fejsbukun e tij, kreu i qeverisë Rama ka publikuar kontratën e parë noteriale të metrave katrorë pa leje, që i kalojnë shtetit për qëllime publike. Në videon e sapopublikuar, Rama thekson lufta me ndërtimet pa leje ka qenë një kalvar i gjatë i nisur prej tij prej shumë e shumë vitesh, së cilës më në fund po i vinte fundi.
“E kemi ulur me 10 fish m2 pa leje, që ndërtuesit i kishin bukë e djathë mu këtu në qendër të kryeqytetit, por ende nuk i kemi ndalur dot për fare, se gjithësesi e kanë gjetur rrugën për ta blerë të drejtën që nuk e kanë, duke paguar ndonjë inspektor, ndonjë polic, ndonjë shef komisariati, po sigurisht duke marrë peng gjykatës e prokurorë, që kanë pasur përherë zellin ta tregojnë vullnetin me më të dobëtit, për një çati apo ndërtim pa leje siç thashë”, tha Rama mes të tjerave në videon e sapopublikuar. “Kemi marrë një vendim të ri qeverie dhe kemi mbyllur çdo shteg, se mua dhe këtë qeveri, ta harrojnë, nuk na blejnë dot […] Dhe ja ku është akti i parë i dorëzimit. 6464 m2 pa leje në mes të Tiranës, i kalojnë shtetit me akt noterial. Kështu që kush merret me mua dhe me ne, duke na treguar si ata që fshihen pas kullave e pas pallatave, le ta shohë mirë të vërtetën, ose të vazhdojë të lehë, por unë i siguroj të gjithë ata që duan një Shqipëri të drejtë, të njëjtë për të gjithë, e ku mos të ketë të fortë përpara ligjit, se nuk do t’i tradhtoj kurrë”, dëgjohet të thotë mes të tjerave kreu i qeverisë Rama në videon e tij.
Sa më poshtë, videoja e publikuar prej Ramës.
