Ish presidenti i Shqipërisë Ilir Meta, ka kërkuar përmes një konference shtypi një transparencë nga ana e qeverisë se çfarë ka ndodhur me hakerimin e faqeve qeveritare, ku janë tërë të dhënat e shtetit e të qytetarëve shqiptarë.
Në fjalën e tij përpara gazetarëve, Meta tha se situata e hakerimit nuk është diçka e re që ka ndodhur këtë vit, por ajo ka nisur së pari me Ramën dhe daljen e të dhënave të 1 milion shqiptarëve gjatë zgjedhjeve të 25 prillit, duke vijuar më pas me hakerimin e të tjera sistemeve, që në gjykimin e Metës e kanë nxjerrë shtetin shqiptar lakuriq përpara të tjerëve, e madje edhe në pazar.
Kryehakeruesi i sistemit është Edi Rama, tha Meta. Kjo u provua botërisht nga dalja e të dhënave personale të gati 1 milion qytetarëve përpara zgjedhjeve dhe përdorimit të tyre nga patronazhistët, vetëm për shantaze të krimit elektoral. Ishte Rama që publikisht e mbështeti, por njëkohësisht edhe shtetërisht, përmes kapjes së drejtësisë, të gjithë këtë proces kriminal që e shfrytëzoi për të përmbysur zgjedhjen e popullit në zgjedhjet e 25 prillit. Ndërkohë, sic e dimë, në dhjetor, u hakeruan të dhënat për rrogat e administratës dhe bizneseve. Po në dhjetor dolën edhe numrat e cel të qytetarëve, dolën targat e makinave, të individëve dhe kompanive. Më pas u haerua edhe e-albania dhe të dhënat u nxorën prej hakeruesëve në shitje, në Pazar. U godit sistemi TIMs që është një cudi e jashtë zakonshme, një sistem perfekt dhe i mbrojtur prej kohësh, sistemi që bëri të mundur edhe liberalizmin e vizave për qytetarët shqiptarë. U godit edhe ALEAT-i, një tjetër cudi. Është goditur edhe sistemi i Policisë së Shtetit, sa u takon gjobave, duke bërë të pamundur që qytetarët t’i paguajnë ato dhe duke i ngarkuar me kamat vonesa në mënyrë të padrejtë. Është bllokuar sistemi i menaxhimit të cështjeve gjyqësore, dhe nul këshohen vërtetimet gjyqësore. Është goditur dhe sistemi Adams dhe Memex i Policisë së shtetit që përbën realisht trurin e policisë në luftën kundër krimit. Janë hakeruar edhe serverat e kamerave të Policisë së Shtetit.
Ju kujtoj këtu që në Maj të 2022, Rama u kërkoi Bankave të futeshin në sistemin e-albania, pra të futeshin në sistemin e tij të shqepur nga ai vetë, gjë e cila për fat të mirë u refuzua prerë nga Banka e Shqipërsisë e nga Bankat e tjetra. E të mos harrojmë që kjo kërkesë e Ramës, vinte pas hakerimeve të një pas njëshme që kishin ndodhur më parë në të gjithë sistemin.
Eksprertët e mikrosoftit theksojnë se hakerat kanë hyrë në sistemin e e-albanias që në maj të 2021-it. Sipas hetimit, aksesi i hakerave është përfocuar në korrik 2021, dhe gjtihashtu janë kryer shumë veprime hakeruese mes tetorit 2021 dhe janar 2022. Prandaj ne kërkojmë të bëhet transparencë e plotë se cfarë ka ndodhur realisht, e po ashtu një vlerësim të situatës së sigurisë kombëtare, tha mes të tjerave Meta.
Kreu i Partisë së Lirisë u shpreh se hetimi i çështjes së hakerimit kishte shkuar në drejtim të gabuar, duke u fokusuar tek gazetarët që publikonin materialet, dhe jo tek shkaqet e vërteta apo personat që e mundësonin një gjë të tillë. “ Vetëm dorëheja e Ramës, mund të kthejë besimin e njerëzve tek institucionet”, deklaroi mes të tjerave Meta.
