“Ja edhe dokumentat e vitit 1990 kur Shqipëria bëri fiks këtë që bëri Greqia sot dhe që është në fuqi sot e gjithë ditën në regjistrin e OKB! As pala greke s’kishte çfarë kontestonte atëherë, as ne s’kemi çfarë kontestojmë sot tek vendimi i Greqisë! Lëreni llumin në batakun e vet!”’
Ka qenë ky statusi i kryeministrit Rama tuiterin e tij, teksa bashkëngjitur ka vendosur edhe dokumentat e viteve ‘90 që kanë lidhje me argumentin e detit.
Ky reagim ka ardhur pas një deklarate të liderit historik të Partisë Demokratike, Sali Berishës, i cili, sapo mori vesh dakordësinë për ta shpënë në Hagë çështjen e detit, u shpreh se kjo marrëveshje, qe “një akt i pashembullt tradhtie kombëtare. Bazuar në këtë marrëveshje të fshehtë, Edvin Kristaq Zografi Bis, duhej të deklaronte dhe të pranonte publikisht: 1 se zgjerimi nga Greqia nga 6 ne 12 milje i ujërave territoriale është e drejtë e saj dhe Shqipëria e pranon këtë, dhe se, 2 – nuk ekziston një marrëveshje mbi kufirin detar dhe shellfin kontinental midis Shqipërisë dhe Greqisë. Këto dy deklarata, në kundërshtim flagrant me Kushtetutën e Shqiperisë dhe të Drejtën Ndërkombëtare, nuk mund të bëheshin kurrë nga një kryeministër apo qeveritar shqiptar, pa u arratisur më parë si i shitur në vendin fqinj.
Në fakt, Rama, i është përgjigjur me disa statuse radhazi Berishës, përmes së cilave, thotë se Llumi nacional-folklorik i politikës shqiptare pa kufij, pa din e iman, është derdhur sërish në oqeanin digjital përmes shpifjes së madhe të “shitjes së detit” Greqisë! Këtë marrëzi ekstreme për përfitime politike mund ta besojnë vetëm ata që s’duan të dëgjojnë e as të kuptojnë!
Pas rrëzimit të marrëveshjes famëkeqe të 2009 dhe mosmarrëveshjes që pasoi, ne kemi arritur më në fund dakordësinë me palën greke që delimitimin e kufirit tonë detar ta çojmë në Gjykatën Ndërkombëtare! Shtrirja 12 milje e Greqisë në Jon s’ka lidhje me zonën joniane mes nesh!
E drejta e 12 miljeve ushtrohet aty ku është e mundur dhe jo aty ku s’ka mundësi, siç është rasti në zonën mes nesh ku vija ndarëse do të vendoset me gjyq! Greqia e ka ushtruar këtë të drejtë së fundmi, fiks siç e ka ushtruar Shqipëria qysh në vitin 1990! Të tjerat janë dokrra!
Jetojmë në shekullin XXI dhe në mes të Europës,ku nuk mund të “shiten” e “blihen” dot dete e territore as fshehurazi, as haptazi nga asnjë autoritet i veçantë! Këto mund të ndodhin vetëm në batakun e ligësisë e të injorancës, ku llumi i shqiptarisë gjen shesh për përsheshin e tij!, ka shkruajtur Rama, në një kohë, kur, në statusin e tij të stërgjgjatë në fejsbuk, Berisha ka theksuar se deklaratat e Ramës për detin “janë në kundërshtim flagrant me kushtetutën, integritetin territorial dhe sovrantitetin e Shqipërisë. Ato janë në kundershtim flagrant me të vertetën historike dhe aktuale të marredhenies midis dy vendeve në këtë fushë, dhe vijnë në kundërshtim të hapur me të drejtën dhe ligjin ndërkombëtar të Detit. Ato janë një akt i mirëfilltë e i shumfishtë i tradhëtisë së lartë kombëtare nga Edvin Kristaq Zografi.
Kjo sepse: 1- Kurrë një kryeministër, as dhe qeveritar, nuk mund të bjerë dakort për akte dhe vendime që prekin direkt integritetin territorial dhe sovranitetin e vendit, siç ndodh me vendimin e qeverise greke, e cila në kundërshtim me të vërtetën historike, pas rreth 90 vitesh ndryshon gjeresinë prej 6 miljesh të ujërave të veta territoriale të depozituar në OKB, në 12 milje në kurriz të vendit fqinj, vazhdon Berisha, dhe 2 – E vërteta historike dhe aktuale e pamohueshme, është se qeveria greke prej 11 vitesh, ishte e kyçur në negociata me qeverine shqiptare për përcaktimin e shelfit kontinental dhe kufirit detar në detin Jon, dhe se këto negociata u konkretizuan në vitin 2009, me një marrëveshje të firmosur dhe pranuar nga të dy qeveritë mbi bazën e të cilës, ujërat territoriale të Shqipërisë, ishin 12 milje, kurse ato të Republikës Helene 6 milje. Pasi kjo marrëveshje u hodh poshtë nga Gjykata Kushtetuese, me kerkesë të Edvin Kristaq Zografit, për llogari të një pale të tretë, Shqipëria dhe Greqia, me mirëkuptim të plotë, vendosën ta paraqesin marrëveshjen në Gjykatën Ndërkombëtare të Detit, me kufinjtë e caktuar prej saj.
Kujtojmë që çështja e kufirit detar me Greqinë, është konfirmuar nga vetë kryeministri por edhe nga pala greke, do shkojë në Gjykatën e Hagës, ku avokatë, ekspertë të marrëdhënieve ndërkombëtare, diplomatë dhe ekspertë të së drejtës së detit, do thirren për të mbrojtur pozicionet e vendeve përkatëse, në mënyrë që të rrisin sa më shumë përfitimet.
