Minstrja e Arsimit Kushi ka njoftuar ditën e sotme përgjatë vendimeve të qeverisë, se të tërë ata që duan të bëhen gazetarë ose përkthyes, mjafton të kenë një mesatare 6.5, e mund të konkurojnë në këto degë.
Ministrja Kushi ka këmbëngulur se për ata që dëshirojnë të vazhdojnë për mësuesi, mesatarja mbi 7 është detyrim, për shkak se dëshirojnë të ruajnë standartet në arsim.
Nga mënyra se si ministrja Kushi e parashtron çështjen e mesatares për degë të caktuara, duket qartë që ajo i konsideron më pak të rëndësishme e më të lehta zanatin e gazetarit e të përkthyesëve se sa atë të mësuesisë, ndryshe nga e tërë bota, e cila i vlerëson e i çmon këto dy zanate shumë më tepër.
Nuk na mbetet gjë tjetër veçse të shohim se ç’përkthyes e gazetarë do prodhojë mesatarja e saposhpallur e zonjës Kushi. Ajo që dihet deri më tani, e që e kemi thënë shpesh të gjithë, është që 7-a është motra e gjashtës, e me gjasa, nuk do të prodhojē dot ata mësues cilësorë të pretenduar nga zonja Kushi.
Sa më poshtë postimi i plotë i ministres se Arsimit Evis Kushi
“Duke nisur nga viti i ardhshëm akademik, në programet e studimit që të çojnë drejt mësuesisë (gjuhët e huaja, gjuhë-letërsi, bio-kimi, matematikë-fizikë, etj.) nuk do të regjistrohen vetëm maturantët që duan të bëhen mësues (me mesatare mbi 7 për gjuhët e huaja dhe 7.5 për fushat e tjera), por edhe ata që më pas duan të ndjekin një profesion tjetër (si për shembull, përkthyes, gazetar, etj.). Këta të fundit, me mesatare më të ulët se kriteri i mësipërm, por minimalisht 6.5, do të kenë një numër matrikulimi të veçantë që nuk i çon drejt masterit të mësuesisë por drejt programeve të tjera masteri që lidhen me profesionin që duan. Theksojmë që kriteri i mesatares për ata maturantë që duan të bëhen mësues (minimumi 7 për gjuhët e huaja dhe 7.5 për fushat e tjera) do të vazhdojë të qëndrojë, sepse ne duam cilësi sa më të lartë në mësimdhënie dhe në përgjithësi në sistemin tonë arsimor.”
