Midis ish-besnikëve të manjatit Trump ka nisur të shtohet pakënaqësia ndaj lëvizjeve të tij lidhur ne Iranin: “Ai po e lë Netanyahun ta tërheqë prej hunde. Ndoshta është koha ta çojmë gjyshin në një azil pleqsh”, thotë konservatorja Candace Owen, një ish-besnike e Donald Trump.
Komentet vijnë menjëherë pasi presidenti amerikan foli kundër Marjorie Taylor Greene, Tucker Carlson, Alex Jones, Megyn Kelly dhe vetë Owenit, ish-aleatë të tij dhe tani kritikë të luftës së Iranit.
Manjati i quajti ata “të çmendur, prishës” dhe “njerëz budallenj”. “Ata janë të gatshëm të thonë gjithçka, vetëm për të marrë pak publicitet falas dhe të lirë”, deklaroi ai.
Trump dhe revolta e MAGA-s për luftën e Iranit.
“Presidenti është çmendur. Unë luftova përkrah Carlson, Owens dhe Jonesit për të ndihmuar në zgjedhjen e Trumpit, kurse tani ai po ndërmerr një sulm të pamëshirshëm duke na goditur të gjithëve”, u shpreh Taylor Greene, një ish-kongresiste dhe avokate e zjarrtë e lëvizjes MAGA, në konflikt me manjatin. “Më trishton ta shoh plotësisht të transformuar, nga njeriu që ishte dikur”, shton Alex Jones, duke vënë në dukje se Trump “po e lë Netanyahun të humbasë rrugën. Lufta e Iranit është katastrofë totale, një goditje e madhe për Amerikën”.
Postimi i gjatë i Greene.
Debati midis Trump dhe ish-aleatëve të tij, është vetëm i fundit në një seri të gjatë. Disa ditë më parë, Greene sulmoi presidentin amerikan me një postim të gjatë dhe të zjarrtë në X, duke denoncuar “gënjeshtrat bërthamore” që janë thënë “për dekada të tëra”.
Duke iu referuar kërcënimit të manjatit për të “goditur” termocentralet dhe urat nëse Teherani nuk do të hapte Ngushticën e Hormuzit, Greene deklaroi: “Të gjithë në administratën e tij që pretendojnë të jenë të krishterë, duhet të ulen në gjunjë, të kërkojnë falje nga Zoti, të ndalojnë së adhuruari presidentin dhe të ndërhyjnë për të ndaluar çmendurinë e Trump. Unë ju njoh të gjithëve, ashtu siç njoh edhe atë: ai është çmendur dhe ju të gjithë jeni bashkëpunëtorë. Unë nuk po mbroj Iranin, por le të jemi të sinqertë për këtë gjë. Ngushtica është mbyllur sepse Shtetet e Bashkuara dhe Izraeli filluan një luftë të paprovokuar kundër Iranit, bazuar në të njëjtat gënjeshtra bërthamore thënë për dekada: se, në çdo moment, Irani ka zhvilluar një armë bërthamore.
A e dini se kush ka armë bërthamore? Izraeli,” vazhdoi Greene. “Ata janë më se të aftë të mbrojnë veten, pa pasur nevojë që Shtetet e Bashkuara të luftojnë luftërat e tyre, të vrasin njerëz dhe fëmijë të pafajshëm dhe të paguajnë çmimin. Kërcënimet e Trump për të bombarduar termocentralet dhe urat, synojnë popullin iranian: pikërisht njerëzit që Trump pretendonte se donte t’i çlironte.”
