Aktorja e njohur hollivudiane Blake Lively, ka akuzuar regjisorin dhe bashkëprotagonistin e “It Ends With Us”, Justin Baldoni, për ngacmim seksual gjatë xhirimeve dhe përpjekje për të “shkatërruar” reputacionin e saj.
Ankesa, e marrë nga Associated Press, i paraprin një padieje dhe është depozituar në Departamentin e të Drejtave Civile të Kalifornisë, siç raportohet nga “New York Times”. Në mesin e të akuzuarëve, përmenden Baldoni dhe kompania e prodhimit “It Ends With Us” (titulli origjinal i filmit), Wayfarer Studios.
Avokati që përfaqëson Baldonin dhe studion, i ka quajtur këto akuza “plotësisht të rreme, fyese dhe qëllimisht skandaloze”. “It Ends With Us ” u publikua në gusht dhe është një përshtatje e bestsellerit të Colleen Hoover, 2016.
Në padi, Lively akuzon Baldonin dhe studion, për përfshirje në një “plan me shumë nivele” për dëmtimin e reputacionit të saj, ku së bashku me bashkëshortin e saj, Ryan Reynolds, pretendojnë një “ngacmim të përsëritur seksual dhe sjellje të tjera shqetësuese” nga Baldoni, dhe një prej producentë të filmit.
Sipas padisë, plani përfshinte orkestrimin e një fushate nëpër mediat sociale kundër saj, e po ashtu edhe publikimin e artikujve kritikë ndaj Lively-t. Sipas saj, Baldoni ka angazhuar publicistë dhe konsulentë “për ta menaxhuar krizën” me një “plan të sofistikuar, të koordinuar dhe të mirëfinancuar hakmarrjeje”, që synonte “varrosjen” dhe “shkatërrimin” e Lively-t, nëse ajo do t’i bënte publike shqetësimet e saj.
Padia pretendon gjithashtu se Baldoni “ka braktisur papritur” planin e marketimit të filmit dhe ka përdorur imazhe të lidhura me dhunën në familje, për të mbrojtur imazhin e tij publik.
Bryan Freedman, avokati që përfaqëson Baldonin, Wayfarer Studios dhe përfaqësuesit e saj, i quajti akuzat “plotësisht të rreme, fyese dhe qëllimisht skandaloze”.
Pretendimet e Lively-t për një fushatë të koordinuar janë të diskutueshme”, u shpreh ai, duke sqaruar se studioja punësoi menjëherë një “menaxher krizash”, për shkak të kërkesave dhe kërcënimeve të shumta bërë gjatë xhirimeve nga zonja Lively.
Freedman shtoi po ashtu se Lively kishte kërcënuar të mos shfaqej më në xhirime dhe të mos promovonte filmin, “nëse kërkesat e saj nuk plotësoheshin”.
“Shpresoj që padia ime të ndihmojë në heqjen e velit të këtyre taktikave hakmarrëse kundër atyre që raportojnë sjellje të papërshtatshme, dhe të ndihmojë në mbrojtjen e të tjerëve, që mund të jenë në shënjestër,” u shpreh Lively në një deklaratë për Times.
