Ka bërë paralajmërime të njëpasnjëshme ditën e heshtjes zgjedhore kreu i Presidencës Meta, duke kërkuar përmes statuseve të njëpasnjëshme hetimin e vrasjes elektorale në Elbasan, ku sipas tij Prokuroria e Elbasanit, por dhe ajo e Përgjithshme nuk kanë bërë detyrën e tyre për hetimin e menjëhershëm dhe dhënien e përgjigjeve që, sipas tij qenë tejet të rëndësishme, për të parandaluar krimin zgjedhor ditën e zgjedhjeve.
Përmes disa konferencave të jashtëzakonshme nga presidenca, Meta u ka bërë thirrje prokurorëve të hetojnë sa më parë ngjarjen, duke i akuzuar ata se po e vonojnë qëllimshëm hetimin e saj.
Në një prej daljeve të tij, Meta i drejtoi disa pyetje prokurorit të Elbasanit Kreshnik Ajazi, duke aluduar se puna e tij mund të qe e njëanshme e të ndikohej nga fakti që i vëllai i tij kandidonte për deputet në zonën e Elbasanit.
Ai ka deklaruar se asnjë nga krimet zgjedhore nuk do mbeten pa hetuar, e sidomos mos hetimi i zgjedhjeve, duke sjelle për tërë ndjekësit e tij gjykimin e juristit Adriatik Lapaj, mbi këtë cështje.
Kriminelët janë kudo të rrezikshëm, shkruan Meta në një nga statuset e tij të shumta ditën e heshtjes zgjedhor. Por më të rrezikshmit janë kriminelët e veshur me uniformë, janë ata që gjenden brenda sistemit gjyqësor dhe të prokurorisë. Prandaj thirrini mendjes, zbatoni ligjin, qëndroni larg ndikimeve politike, mos u bëni palë dhe ruani integritetin e detyrës. Përmbushni detyrën pa asnjë vonesë dhe mos e detyroni Popullin t’ju arrestojë në flagrancë përmes ligjit, që Kuvendi i Shqipërisë ka miratuar. Presidenti i Republikës është gjithmonë me Kushtetutën dhe Sovranin. Presidenti i Republikës është gjithmonë gati për të marrë përgjegjësinë për çdo Dekret në mbrojtje të Zgjedhjeve, Demokracisë dhe Popullit nga dhuna e oligarkisë! Nesër duhet të jetë Festa e Demokracisë., duke e mbyllur ditën e heshtjes zgjedhore, e tillë për krerët e partive, por jo për Presidentin e vendit, me një tjetër paralajmërim.
Të dashur Prokurorë dhe Gjyqtarë! Dëgjojeni mirë Presidentin e Republikës! Boll dëgjuat përfaqësuesin e Ndrangheta-s, Don Agaçion. Nëse jo, një pikë gjaku të derdhet nesër, por edhe një pikë loti, mjerë ju! Nesër duhet të jetë Festa e Demokracisë!, shkruan ai.
Nuk dihet nëse Meta di ndonjë gjë, siç dihet rëndom ose parandjejet kur paralajmërojmë për diçka. Ajo që dihet, është që me statuset e tij të njëpasnjësshme ai ka rritur tensionet në ditën që i paraprin votimit për zgjedhjet e përgjithshme parlamentare në Shqipëri.
