Në prag të zgjedhjeve në Gjermani, kancelari gjerman Olaf Scholz duket i sigurt se do të ketë sukses, pavarësisht se sondazhet thonë të kundërtën. “Shumë do të zgjedhin socialdemokratët”, shtoi ai, “në mënyrë që të jemi mjaftueshëm të fortë që unë të vazhdoj udhëheqjen e vendit”.
Sondazhi i fundit i bërë nga Insa për të përditshmen Bild në prag të zgjedhjeve në Gjermani, e sheh CDU-CSU-në gjithmonë të parën, por nën pragun e 30%-it, diku tek (29.5%).
Për Merz-in do të ishte thelbësore të merrte të paktën 30, për të qenë në gjendje të zhvillonte negociata nga një pozicion më i fortë. Do të ishte ende një rezultat i rëndësishëm: në vitin 2021 konservatorët qenë tek 24.1%.
Alternativa fuer Deutschland (Afd), pritet të jetë e dyta me 21% dhe të dyfishojë votat e vitit 2021 (10.3%).
Social Demokratët e Olaf Scholz janë tek 15%, duke humbur më shumë se dhjetë pikë në krahasim me zgjedhjet e fundit (25.7%).
Të Gjelbrit e Robert Habeck-ut ndalen tek 12.5% (në vitin 2021 arritën në 14.8%), ndërsa Linke buzëqesh me 7.5% krahasuar me 4.9% e vitit 2021, kur nuk e arriti pragun, por hyri në parlament vetëm falë disa dispozitave të ligjit zgjedhor.
Në luftë për të hyrë në Bundestagun e ri janë grupi i Sahra Ëagenknecht (5%) dhe liberalët e FDP-së të cilët me 4.5%, shohin të përmbyset rezultati i 2021-it (11.5%), duke rrezikuar të mbesin jashtë parlamentit. Sa më shumë parti hyjnë në Bundestag, aq më e ndërlikuar bëhet mundësia e një koalicioni “me dy këmbë”, pra me vetëm dy parti: nuk është e sigurt që një koalicion mes konservatorëve dhe socialdemokratëve, rezultati më i pritur i këtyre zgjedhjeve, mund të ketë shumicën. Sipas mediave botërore, negociatat mes tre forcave politike, mund të jenë të ndërlikuara dhe të marrin më shumë kohë.
