Në përpjekje për të hedhur poshtë akuzat e kundërshtarëve politikë, mbi numrin e shtretërve të mbetur nëpër spitalet Covid, apo cilësinë e tyre, kryeministri Rama po publikon përditë në faqen e tij në Facebook, xhirime nga brenda spitaleve Covid, me shtretërit bosh e me pajisjet e duhura, e madje edhe intervista të të prekurëve me Covid-19, të cilët dëshmojnë për punën e palodhur të mjekëve brenda tyre.
Në një prej intervistave të marra një prej pacientëve, në spitalin ‘Shefqet Ndroqi’, vihet re që gazetari e ka afruar shumë pranë të sëmurës me covid-19 mikrofonin, dhe stërklat e të moshuarës teksa flet dhe uron mjekët, bien pikërisht mbi mikrofonin dhe skafandrën e gazetarit, që ndodhet thuajse ngjitur me të.
Kujtojmë që këshillat e mjekëve të Komitetit të Ekspertëve, por edhe të vetë Kryeministrit dhe Ministres së Shëndetësisë, kanë qenë, veç mbajtëses së maskës, edhe ruajtja e distancës, pikërisht për të shmangur infektimet me virusin që ka vënë në krizë një botë të tërë.