Kreu i qeverisë Edi Rama, ka deklaruar sot në Kuvend se në rend të ditës është edhe miratimi i ligjit për dyfishimin e ndihmës ekonomike të fëmijëve nën kujdesin e Republikës, prindërit e të cilëve kanë humbur jetën në krye të detyrës.
Duke e nisur nga janari, tha mes të tjerave Rama, të gjitha nënat me tre e më shumë fëmijë, në skemën e ndihmës ekonomike, do të përfitojnë dyfishin e shumës, ashtu sikurse do të përfitojnë dyfishin e ndihmës të gjitha gratë e dhunuara apo të trafikuara, të gjitha nënat me fëmijë me aftësi ndryshe, e po ashtu edhe jetimët që janë në skemën ekonomike. Por këtyre u shtohet edhe një kategori tjetër, ata të nismës së re ligjore, me statusin “fëmijë në kujdesin e Republikës”, një nismë që mishëron një ambicje të kësaj qeverie, për ata e që janë kategoria më vulnerabël. Me votën e sotme kuvendi do të përcaktojë me ligj, një status të veçantë, për fëmijët apo personat në kujdestari, të dëshmorëve të atdheut, apo të mjekëve e infermierëve që kanë humbur jetën si rezultat i pandemisë, personave që kanë humbur jetën në përpjekje për të mbrojtur pronën publike apo jetën e të tjerëve. Përmes këtij ligji, shteti merr përsipër t’u sigurojë këtyre fëmijëve, një vijimësi jete, në kushtet e mungesēs së prindit apo kujdestarit të tyre, tha mes te tjerave Rama.
