Për të gjithë lexuesit, libri i shkruar nga gazetarja italiane Eva Grippa, “Elizabeta dhe të tjerat, dhjetë gra për të njohur mbretëreshën e vërtetë”, nën shqipërimin e përkthyeses Albana Nexhipi Lekaj, botuar prej “Botimeve Jozef”, vjen me një stil sa gazetaresk e po aq edhe letrar, duke i përshfaqur lexuesit, atë anë intime e të panjohur të një prej figurave më të mëdha politike të kohërave të sotme.
Me një sërë datash e ngjarjesh të rëndësishme historike, nisur që nga Lufta e Dytë Botërore, brenda rreshtave të këtij libri lexuesi do të gjejë jo vetëm ndodhitë historike që shenjuan formimin e Elizabetës II e të botës që rrojmë po ashtu, por edhe përpjekjet e një shoqërie të tërë për të dalë nga kthetrat e luftës, tendencat më të fundit të modës, intrigat e thashethemet e Pallatit, përpjekjet për t’u shfaqur një mbretëreshë dinjitoze edhe pse krejt e re në moshë, luftën e brendshme të nëne, së cilës i duhej t’u bëhej shoqe nuseve të djemëve, por nuk duhet të hidhte poshtë asesi të bijtë prej prapësive që bënin, një motër, një stërgjyshe të dashur e të dhimbsur, por të paepur e të rreptë sa u takon llogaritjeve mbi fatin dhe të ardhmen e mbretërisë.
Marrëdhënia e saj dadon e parë Marion Crawfordin, që e braktisi jetë e mot për pako gjë, me të ëmën Elizabeth Bowes-Lyon-in, një grua me një pushtet absolut mbi të bijën sa qe gjallë, me të motrën Margaretë, aq artiste në shpirt, sa dhe tekanjoze e me një jetë dramatike, me nusen e xhaxha Eduardit, Wallis Simpsonin, falë të cilit gëzoi në fakt edhe fronin pas dorëheqjes së tij për hir të dashurisë për amerikanen, me të bijën Anën dhe të dashurit e saj, me nuset e djemëve, Diana Spencerin dhe Sarah Fergusonin, me nusen e dytë të të birit Karlit, Camailla Parker Bowlesin që e luftoi parreshtur deri në çastin e fundit, e mandej edhe me nuset e nipërve, Kate Middelton e Meghan Markle, nxjerrin në pah ato anë që kronikat e përditshme mbi mbretërorët e Anglisë nuk i thonë, e që gjallojnë më së shumti vetëm brenda oborrit dhe qarqeve lidhur me të ngushtë.
Pse u ndanë Diana me Karlin? Cila ishte marrëdhënia e Elizabetës II me ledi Dianën? A e mbështeti ajo nusen e të birit, të cilën, nga sa thuhet e miratoi vetë? Si u përjetua vdekja e ledit Diana në Pallat, nga mbretërorët e nga të bijtë? Pse Kate priti aq gjatë për t’u martuar me Uilliamin, e pse Meghan Markle-it iu hapë dyert menjëherë prej Madhërisë së Saj?
Dhe mbi të gjitha, për të tërë ata që do ta marrin në dorë këtë libër, një këshillë nga autorja Eva Grippa: mos u habisni kur të lexoni që Elizabeta II vesh dorashkat e gomuara dhe nis të lajë enët në lavamanin e shtëpisë. Në Balmoral, mbretëresha më e famshme e kohërave të sotme, është thjesht gruaja e Filipit, mamaja e Karlit, vjehrra e Dianës, dhe gjyshja e Uilliamit e Harrit, një zonjë shtëpie si të gjitha gratë, një luks që ajo e shijon pamasë.
