Ka prezantuar programin e saj dhe qasjen nëse do të zgjidhet në krye të Partisë Demokratike më 13 qershor, kandidatja demokrate Edith Harxhi, në një takim me demokratët e Beratit.
Në fjalën e saj përballë të djathtëve në sallë, Harxhi ka theksuar sidomos kthimin e PD-së në shinat ideologjike të së djathtës, dekomunistizimin e vendit, e sidomos, hapjen e dosjeve të sigurimit, si e vetmja mënyrë për të spastruar edhe radhët e PD-së prej atyre që mund të kenë qenë pjesë e regjimit dikur.
Në programin tim, tha Harxhi, unë kam futur elementë që kanë të bëjnë me futjen e partisë në shina ideologjikë. Aktualisht, partia jonë është një parti që i ngjan më shumë një partie social-demokrate të qendrës, shpeshherë me elementë edhe më të majtë se social-demokracia, por ne jemi ngritur si parti e djathtë në ’90-n, dhe unë, si studente e dhjetorit, mendoj që PD-ja duhet të ngrihet mbi parimet e 1990-s, dhe këto parime janë shumë të rëndësishme për ne të djathtët.
E para, antikomunizmi, ne ende nuk kemi bërë një ligj për dekomunistizimin e vendit, dhe kjo është shumë urgjente, është thirrëse, por përpara se të bëjmë ligjin për dekomunistitimin e Shqipërisë, ne duhet patjetër si PD, t’u kërkojmë një falje publike të gjithë atyre që kanë qenë viktima të komunizmit, të cilët nuk kanë marrë atë që ne u kemi premtuar ndër vite. Dhe këtu nuk flas vetëm për çështjen e dëmshpërblimit, se për mua dëmshpërblimi është lëmoshë në fund fare. Unë flas këtu për një dëmshpërblim moral, për një detyrim moral, që ka e gjithë shoqëria shqiptare ndaj kësaj shtrese, dikush më shumë, dikush më pak.
Ne nuk kemi bërë esecën, atë që është ecenciale për trajtimin e antikomunizmit, vazhdoi ajo. Ne kemi ende një shtet, ku ne nderojmë diktatorin në ditë të shënuara, një provokim shumë i madh ky, jo vetëm për ne demokratët, jam e sigurt që është për të gjithë shqiptarët. Ne nderojmë përmes librave, figura të komunizmit, madje ne ende i kemi edhe në kuvendin e Shqipërisë. Ne ende nuk kemi bërë një rishikim të dosjeve, se po të bëhej, do ta shihnit që edhe në kryesinë e PD-së mund të ketë nga ata që kanë dosje në Sigurimin e Shtetit, dhe jo më figura të tjera në Parti.
Dhe ky është një proces për të cilin u detyrohemi jo vetëm demokratëve, por gjithë shqiptarëve, ka thënë në fjalën e saj Harxhi.
