nga Anila Hoxha
Xhulio Prela, me detyrë polic i Forcave të Ndërhyrjes së Shpejtë, u vra në rrethana ende të paqarta, nga autorë ende të pagjetur. Derisa çështja të zbardhet, kushdo ka të drejtë të besojë së Xhulio, 26 vjeç, është ekzekutuar për shkak të detyrës.
Një polic që u përpoq të merrte gradën e nënkomisarit, ndaj dhe hyri në Akademinë e Sigurisë. Një polic që, si edhe ata shokët e kursit në Akademi, apo edhe paraardhësit, që shteti kërkon t’i shkollojë dhe t’i trajnojë me fjalën e fundit të ekspertizës, por që ua ndërpret rrogën gjatë kohës që ata janë edhe policë edhe studentë.
Një nënkomisar i tillë në tentativë gjatë kësaj kohe, që shkon me ndërprerje në punë, paguhet vetëm 19 mijë lekë të reja. Dhe duhet të mbijetojë me 19 mijë lekë, pasi, siç belbezohet, për çfare i duhen lekët më shumë një polici në akademi, kur edhe pilafin dhe çajin ua paguan shteti?”.
Vërtet, për çfarë ?
Xhulio fjalëpakëti, e përshkruan shoku i tij në një drejtori qarku… Xhulio i qeti.
Por Xhulio ditët e fundit kishte kërkuar borxhe tek të afërmit, pëshpërit një tjetër, duke dredhur duhan.
Është dita e lamtumirës së 26 vjeçarit që për gjashtë vite e deshi policinë, e deshi uniformën, siç e do kushdo qe mendon se nga ajo uniformë nis besimi në shtet.
Në shtëpinë përdhese dhe modeste të prindërve në periferi të Tiranës, shokët e tij në të njëjtin rang me të, kanë ardhur t’i thonë “Shko në paqe, Xhulio”. Por asnjë shef. Asnjë i rëndësishëm nuk e kaloi deri mbasdite vonë atë prag dere, atë derë polici, që kemi të drejte të besojme se u vra si polic, derisa të zbardhet e kundërta, siç janë pistat që qarkullojnë, që nga vrasja rastësore, vrasje për mosmarrëveshje borxhi, vrasje se pati një konflikt kur ishte polic në Lezhë dhe e përcollen polic në Shkodër…
Sikur konflikti i Lezhës të kish qenë aq vdekje prurës, se si mund ta shpëtosh policin duke e lëvizur nga Lezha e duke e çuar në Shkodër, anipse kalon nëpër Lezhë, nuk di ta shpjegoj.
Xhulio fjalëpakëti ishte polic, nga inspektor ai fitoi provimin promovues dhe vazhdoi spiralen e karrierës në polici, megjithatë ndërkohë paguhej vetëm 19 mijë lekë të reja. Shteti po e trajnonte, dhe per tre vjet ai do kishte këtë rriskë buke.
Vërtët, ç’i duheshin më tepër? Pilafin ua jepnin në Akademi.
Andaj, ji i lumtur ti polici bazë, je mirë aty poshtë.
Çështja e meritokracisë, e gradave, drejtimi dhe lidershipi në polici, nuk ka gjetur ndonjëherë zgjidhje. Vitet e fundit, edhe pse ligji është si e bardha në të zezë, miq stërmiq po qerasen fillimisht, duke u emëruar në poste drejtuese ndonëse nuk e meritojnë në përputhje me gradën. Mandej ngjiten e ngjiten me poste dhe grada, që ua fal gjykata. Është kthyer në modë. E si mund ta duash mandej të aftin, të drejtin, a atë policin qe ndjek zinxhirin e karrierës për vite e vite! 19 mijë lekë i dalin e i mjaftojnë !! Kot shkon ne Akademine e Sigurise, kot ndjek programet dhe zbaton pikë për pikë ligjin për të ardhmen në polici. Do zvarritesh vazhdimisht mes pilafit dhe gradave që do të duhen 20 vjet që ti fitosh dhe pastaj vjen një tjetër, të fton të heqësh dorë nga grada, ose të degdis diku dhe pastaj, sipas pozicionit, ti ndëshkohesh me ulje në gradë.
Ose ndodh kështu, policë, që pasi kalon koha dhe shuhet mëria, ata kokëulur i drejtohen gjykatës. Por kësaj radhe jo për ta fituar gradën se u emëruan shefa dhe shefllëku kombinohet me nje grade që duhet falur apriori. Por sepse janë ulur në gradë dhe kërkon t’i kthehet dinjiteti nga kjo tallje
Po ç’na duhen të tëra këto, kujt i bëhet vonë për biseda gradash dhe shefash?
Vërtet, pilaf dhe çaj t’i servir Akademia. Nga këtu mandej, kërkojmë polici efektive, me drejtues të aftë, shefa komisariatesh që nuk kompromentohen dhe as blihen. Mund të bëhet e besueshme, por jo këtu.
Sepse …
Gradat e falura sa andej-këtej, promovimi i pamerituar sa andej-këtej dhe si të mundemi, sjell një polici të kapur , të pazonjën për të arrestuar dhe mbajtur qëndrim të njëjtë, si me atë që nuk vendos rripin dhe me atë që është influent në krim. Shko në paqe, Xhulio! Siç e gjete, e le policinë. Për të paprekshmit, duhen të paprekshëm!
