Gjatë fjalës së saj ditën e sotme në Kuvend, deputetja demokrate Grida Duma e vuri theksin veç të tjerave edhe tek studentët në vend, dhe vështirësitë e tyre ekonomike në këtë kontekst krize botërore.
Teksa në Parlament diskutohej Projektligji “Për aderimin e Republikës së Shqipërisë në Konventën mbi Organizatën Ndërkombëtare për ndihmat detare në lundrim”, deputetja demokrate Duma, hoqi një diskutimin e saj paralelizëm mes studentëve si vela e vendit dhe mënyrës së mbështetjes që qeveria i jep këtij targetgrupi.
“Frika ime më e madhe, u shpreh Duma, janë studentët. U çuan dhe thanë duam një mbështetje 100 dollarë a 100 mijë lekë të vjetra në muaj, dhe çfarë ju ndodhi? Kreu, u tha “kur ju dëgjova, ju nuk meritoni asgjë”. S’meritojnë ata asgjë! Ata janë shkëlqim në fakt, që vazhdojnë të jenë ende këtu, sepse në 90-n, ’91-n, ’92-n, me anijet që lundronin jashtë brigjeve tona kapicë, shqiptarët qanin kur përcillnin njerëzit e vet. E dini kush është tragjedia sot? Që prindërit qeshin kur i përcjellin, gëzohen që po ikin nga ky vend, që po i çojnë fëmijët atje. Në Gjermani student për hir të krizës do marrë 200 euro, në Francë, shteti i jep 170 euro mbrapsht, në Francë dhe në Gjermani menca kushton 6 euro në ditë, në Francë me 9 euro shëtit gjithë Parisin, se ka kartën e studentit. E dini se çfarë thotë analiza për studentët shqiptarë? Duhen minimalisht 510 euro që ai të jetojë në Tiranë, me 40 % të qerave të ngritura, që i duhet minimalisht 10 euro të përballojë ushqimin, se dhe i duhet të gatuajë vetë, se nuk ka menca, se i duhet të blejë edhe librat e skaduara nga pikpamja kurrikulare, dhe askush nuk i jep asgjë. Vela më e madhe e anijes së Shqipërisë është rinia e vet. Ju e keni çuar velën jashtë vendit, ndaj kjo anije nuk lundron dot, tha mes të tjerave deputetja demokrate Duma.
