Ka prezantuar ditën e djeshme disa ndryshime në nenin 29 të ligjit “Për menaxhimin e integruar të mbetjeve” ministrja e Mjedisit Mirela Kumbaro, e cila në Komisioni për Veprimtaritë Prodhuese, Tregtinë dhe Mjedisin, ka sqaruar se ato ndërmerren jo vetëm për pasjen e një mjedisi sa më të pastër, por edhe për përafrimin e Shqipërisë me legjislacionin Evropian, i cili ka kohë që ka bërë dhe vazhdon të bënë përmirësime të ligjeve në këtë drejtim.
Shqipëria ndot me 2.3 qese plastike, që do të thotë me 3 qese plastike për cdo person në ditë, tha Kumbaro, e barabartë kjo me 26 mije e 280 ton qese plastike në vit. Qeset janë shkaku kryesor i ndotjeve në Shqipëri, me 6.9 kg për njeri në vit, të cilat përfundojnë të gjitha në det. Pasojat nuk janë vetëm për syrin, por edhe për tërë gjallesat e detit e të tokës e për krejt zinxhirin ushqimor. […] Ndaj propozojmë, të shtohet pika 3. Ne duam të shtojmë që ndalohet përdorimi, hedhja në treg, prodhimi, importimi apo futja në territorin e Republikës së Shqipërisë, i qeseve plastike mbajtëse, qeseve të lehta plastike mbajtëse, qevese shumë të lehta plastike mbajtëse, si dhe të qeskave plasike mbajtëse të oksodegradueshme apo oksobiodegradueshme. Me këtë ligj synohet të ndalohet prodhimi, përdorimi, futja e qeseve plastike mbajtëse në çfarëdolloj aksesi, që bëjnë pjesë në kategoritë e mëposhtëme.
Nuk kanë munguar në parashtrimin e Kumbaros as penalitetet për ata që do të importojnë apo përdorin qese plastike, penalitete që do të shkojnë deri në 1 milionë e 500 mijë lekë për ata që i importojnë dhe deri në 100 mijë lekë për ata që i përdorin.
Në nenin 62 parashikohen sanksionet për veprimet që do të bien në kundërshtim me nenin 29, sqaroi ajo. Konkretisht sugjeromë që çdo person që hedh në treg, prodhon, importon apo fut në territorin e Shqipërisë qese plastike mbajtëse, apo qese të lehta e shumë të lehta mbajtëse, sipas përcaktimeve në nenin 29, të dënohen me gjobë nga 1 milionë në 1 milionë e pesëqind mijë lekë. Ndërkaq, çdo person që përdor në territorin e Shqipërisë qese plastike mbajtëse, të lehta e shumë të lehta mbajtëse, dënohet me vlerën nga 30 deri në 100 mijë lekë.
