Një rast tronditës është bërë sot me dije prej portalit Ballkanweb, i cili njofton rastin e dy prindërve të rinj, të cilëve u është infektuar fëmija me HIV, teksa e kanë pasur të shtruar në reanimacionin e pediatrisë në QSUT, për hir të një bronkopleumonie.
Nga sa referon Ballkanweb, ngjarja ka ndodhur më 27 nëntor 2021, kohë në të cilën fëmija i tyre 1 vjecar ka ndenjur i shtruar për thuajse tri muaj, deri më 9 dhjetor 2021 në këtë spital, duke marrë vesh më vonë prej analizave të kryera, se fëmija e tyre mbarte nl trup virusin HIV.
Prindërit sipas Ballkanweb “kanë kërkuar në mënyrë të vazhdueshme një takim me ministren Ogerta Manastirliu, por kjo gjë nuk është mundësuar. Në këto kushte, ata kanë lidhur një urë komunikimi me zyrtarë të tjerë. Në mesazhe, shihet se prindërit kanë biseduar me zv.ministren Mira Rakacolli, që jo në pak raste, zgjedh të neglizhojë shkrimet dëshpëruese të nisura nga prindërit e 1-vjeçarit. Në të tjera komunikime, shihet se shefja e ISHP nuk i jep ndonjë sqarim të detajuar prindërve.”
Po sipas shkrimit në Ballkanweb, “prindërit, e kanë referuar çështjen fillimisht në Ministrinë e Shëndetësisë, më pas në Kryeministri, por nuk morën asnjë përgjigje. Në këto kushte ato e dërguan në Prokurori, me prokuror, Saimir Hysi, por edhe në këtë organ nuk gjetën zgjidhje. Prokurori Hysi vendosi mosfillimin e hetimit për çështjen duke argumentuar sipas tij, që personat e kallëzuar nga dy prindërit nuk kanë bërë akte të përafërta me neglizhencën mjekësore dhe sipas tij, nuk kanë konsumuar një vepër penale. Por ky vendim, u kundërshtua nga Gjykata e Shkallës së Parë në Tiranë, që u shpreh se ka gjurmë të neglizhencës mjekësore dhe kërkoi rifillim të hetimit. Aktualisht, çështja do të vendoset në Gjykatën e Apelit”.
Po çfarë parashikon ligji i shtetit shqiptar për rastet e personave që infektohen me virusin HIV?
Po sipas Ballkanweb-it, “në ligj parashikohet që personi që është i infektuar me këtë virus përfiton barnat pa pagesë, kura të specializuara të mbuluara nga shteti e mbi të gjitha, të drejtën për analizat e detajuara nga vetë institucionet, por këto shërbime, nuk iu janë ofruar apo plotësuar dy prindërve të të miturit. Në një rast të ngjashëm nëse do të ndodhte në Itali dhe do të vërtetohej neglizhencë mjekësore, shteti italian jo vetëm do t’i ofronte kurat e nevojshme, por edhe një dëmshpërblim prej 3 mln eurosh. Po në rastin e këtij vogëlushi, ku ëndrrat e një familjeje dhe një fëmije po veniten dita ditës, ngremë pyetjen si do të veprojë shteti shqiptar?!”
