Zgjedhjet nuk janë më garë. Nuk janë as festival demokracie. Janë një procedurë noteriale, ku populli nuk zgjedh më, por vetëm vulos vendimet e marrë nga liderët.
Koha kur populli vendoste ka kaluar.
Sipas modelit të ri, në vend që populli të zgjedhë përfaqësuesit e tij, liderët caktojnë listat e fituesve. Votimi është thjesht një formalitet estetik, ku qytetarët miratojnë vizionin e liderëve të pagabueshëm.
85%-90% e përbërjes së parlamentit të ardhshëm dihet që sot. Zgjedhjet e 11 majit bëhen vetëm për të plotësuar 10-15% të vendeve bosh dhe për të provuar se cila kompani sondazhi është më e saktë. Mrekulli demokratike!
Në Amerikë, anëtarët e parlamentit quhen “përfaqësues” njerëz që flasin në emër të popullit (Dhoma e Përfaqësuesve). Në latinisht, “deputet” do të thotë “shërbëtor”, dikush që punon në interes të atyre që e zgjedhin. Në Angli, deputeti është “zëvendësues” pra, dikush që hyn në vend të tjetrit, që populli të ketë një zë.
Në Shqipëri? Deputeti nuk përfaqëson më askënd, sepse përfaqësimi është vjetëruar. Nuk zëvendëson askënd, sepse askush nuk e ka zgjedhur. Deputeti është noter, që legalizon vendime që populli as nuk i merr dhe as nuk i kërkon.
Dikur, deputeti ishte i detyruar të fliste. Tani, e ka të ndaluar të mendojë.
Demokracia elektorale është e vjetëruar. 3Demokracia e re noteriale nuk lë vend për konfuzione apo dilema morale. Lideri mendon, populli firmos. E si mund të ketë një demokraci më të pastër, më efikase dhe më moderne se kjo?
Populli nuk lodh më mendjen për të zgjedhur më të mirët, sepse tashmë më të mirët janë zgjedhur paraprakisht nga lideri, që ka gjithmonë të drejtë, edhe kur gabon!
