Kureshtia për të parë se si do të zhvilloheshin ceremonitë e djeshme të dy grupimeve më të mëdha në vend, nuk qe e pakët, kjo edhe për faktin se në kontekstin ku jemi, duke pasur parasysh përplasjet e mëdha ndodhur katërvjeçarin e fundit mes tyre, incidentet e mundshme mund të ishin në prag. Dhe në fakt ato nuk munguan, edhe pse erdhën përmes sjelljeve tipike të një lufte të ftohtë, pavarësisht entuziazmit që karakterizoi kampin e djathtë.
Së pari, në ceremoninë e djeshme e Djathta shkeli në mënyrë flagrante rregullat e vendosura për pandeminë, duke nxjerrë jo vetëm turma të mëdha njerëzish në shesh, por duke lejuar edhe që distanca mes tyre e po ashtu edhe mbajtja e maskave, të mos ishin të duhurat, duke e shndërruar kështu aktivitetin e djeshëm, në një vatër të qenësishme infektimesh, dhe kjo, në një kohë kur shumë vende të Europës po mbyllen sërish, nga frika e një vale të tretë.
Së dyti, e Djathta nuk respektoi oraret. Vajtja e kreut të saj në orën 18.00, pikërisht në orarin që deklaroi kreu i Bashkisë për nisjen e ceremonisë në kampin majtë, përkundër atij të shpallur prej Tabakut, e cila deklaroi orën 5-5.30 si orë nisjeje, mund të lexohet më së miri edhe si element provokimi nga ana e të Djathtës, e cila, qartësisht e përgjegjëshsme për pasojat, zgjodhi t’i shfaqej kështu publikut, me gjasa që t’i jepte atij mundësinë të shquante në pikëpamje krahasimore, mbështetjen që ajo dhe kreu i saj gëzojnë në popull, pra, me pak fjalë, për të krijuar një lloj sugjestionimi tek të pavendosurit, të cilët jo rrallë priren drejt atyre që identifikohen si fitimtarë gjatë garës.
Por, a e dëshmon turma e djeshme mbështetjen që ka kreu demokrat në popull apo fitoren e tij ? A shëmbëllen humbëse e majta, me një ceremoni cilësuar nga të djathtët ‘si mortore’?
Me shumë gjasa jo. E lexuar në një kontekst pandemie, organizimi i një ceremonie të tillë nga e Djathta, i shëmbëllen më së shumti mosdaljes dot të kreut të saj, nga modelet konfliktuale fushat-bërëse të ish liderit historik të së Djathtës, Sali Berishës, për shkak se, në ceremoninë e djeshme, u vu re qartësisht tendenca e saj për të kryer shkelje rregullash e mosmbajtje fjaleje, të cilat të shtyjnë drejt parashikimit të një gare jo të paqtë, alla berishiane, konfliktuale, që synon me çdo kusht fitoren, pavarësisht kostove.
E teksa e Majta, me sa thotë Rama përmes shifrave, ka siguruar me gjasa vaksina edhe për ata që ishin dje në shesh, kreu i të Djathtës, përkundër pretendimit të derimëtanishëm si “i pari lider i shkolluar jashtë, që do sjellë një frymë perëndimore në qeverisje”, tregoi edhe një herë se nuk ka arritur të krijojë ende një individualitet të vetim politik, duke ndjekur edhe pas 7 vitesh në krye të së Djathtës, modelet fushat-bërëse ish drejtuesit të saj, Berishës, e duke i dhënë kështu një pikë plus kreut të së Majtës, i cili, ndryshe nga sa e kemi parë në fushatën e derimëtanishme, dje u shfaq më i përgjegjshëm se kundërshtari i tij politik për jetën e popullit.
