Bursë sa një pagë minimale për të tërë ata studentë që do të ndjekin degët e harruara në universitet, si arsim fillor, arsim parashkollor, histori – gjeografi, inxhinieri matematike, inxhinieri fizike.
Lajmin e ka bërë më dije ministrja e Arsimit Kushi përgjatë shpalljes së vendimeve të qeverisë ditën e sotme, duke e cilësuar këtë nismë si një lajm të mirë për maturantët që duan të vazhdojnë studimet e larta e po ashtu edhe për universitetet që do të duan të rigjallerojnë disa programe studimi.
Bursa sa paga minimale nuk do të varet prej mesatares, bëri me dije Kushi, dhe për çdo universitet do të ketë një kuotë të caktuar bursash.
Pjesë nga fjala e ministres Kushi.
“Një lajm i mirë për të gjithë maturantët që duan të vazhdojnë studimet e larta, por edhe për universitetet që duan të rigjallërojnë disa programe studimi prioritare për nevojat e vendit.
Bursat e studimit me vlerë sa paga minimale do të shpërndahen duke vendosur kuota për çdo universitet publik, për t’i dhënë më shumë mundësi studentëve të të gjitha universiteteve publike;
Ndryshe nga viti i kaluar, ku kriter ishte mesatarja e shkollës së mesme mbi 8.5, këtë vit përfitues të këtyre bursave do të jenë studentët pavarësisht notës mesatare, por gjithmonë duke plotësuar kriteret e pranimit për çdo program studimi, njësoj si të gjithë studentët e tjerë;
Studenti përfitues nuk ka detyrimin të ruajë mesataren e shkollës së mesme, me të cilën ka përfituar bursën, me qëllim që mbështetja financiare të zgjasë përgjatë gjithë periudhës së studimeve;
Lista e programeve prioritare është zgjeruar edhe me disa programe të tjera, si: Arsim Fillor, Arsim Parashkollor, Histori – Gjeografi, Inxhinieri Matematike, Inxhinieri Fizike, etj.
Ftoj të gjithë maturantët ta vlerësojnë këtë mundësi për të përfituar mbështetje financiare, duke vazhduar më tej edhe pas diplomimit të punësohen në Shqipëri e të japin kontribut për vendin minimumi për tre vite. Suksese!”
