“Inteligjenca artificiale do të jetë ose mjeti më i madh për barazinë i shpikur ndonjëherë, ose burimi më i keq i padrejtësisë. Sfida është kolosale.” Kështu shprehet Bill Gates, i cili – në një sërë intervistash dhe në një ese të publikuar në faqen e tij të internetit – ka paralajmëruar për rreziqet që lidhen me inteligjencën artificiale (IA).
Për themeluesin e Microsoft, kjo teknologji e re është më e rrezikshme sesa liderët e industrisë janë të gatshëm ta pranojnë publikisht, dhe tranzicioni që do të pasojë do të shënojë një nga “periudhat më të trazuara në historinë njerëzore” – një periudhë të cilën qeveritë janë të papërgatitura për ta përballuar.
Ai nuk është i vetmi që jep alarmin; edhe kompanitë OpenAI dhe Anthropic kanë kërkuar të paralajmërojnë liderët botërorë për nevojën e politikave të reja për menaxhimin e këtyre rreziqeve.
“Shumë vende pune do të zhduken përgjithmonë. Në vitin 1933, gjatë Depresionit të Madh, papunësia në Shtetet e Bashkuara arriti në 25%. IA mund të mos arrijë në ato nivele, por ndikimi i saj nuk do të kufizohet vetëm në një cikël ekonomik,” paralajmëroi Gates, duke u bërë thirrje qeverive që të rezervojnë 40% të vendeve të punës ekskluzivisht për njerëzit. “Më pëlqen shprehja ‘të rezervuara për njerëzit’, sepse më bën të mendoj për rezervatet natyrore – vende ku mund të ndërtoheshin ndërtesa dhe rrugë, por që ne vendosëm t’i ruanim sepse humbja e tyre do të ishte tepër e madhe,” shpjegoi ai në esenë e tij. Për të adresuar sfidat që sjell kjo teknologji e re, Gates u bëri thirrje autoriteteve në mbarë botën – përfshirë Kinën – që të bashkëpunojnë. “Do ta diskutoj këtë me Xi [Jinping]-un,” siguroi ai agjencinë Reuters.
Pas një periudhe të trazuar për shkak të përfshirjes së tij në skandalin e Jeffrey Epstein, Gates vendosi të thyejë heshtjen lidhur me këtë çështje, i shtyrë nga fakti se inteligjenca artificiale i ka tejkaluar pritshmëritë e tij dhe se industria ka anashkaluar çështje të rëndësishme – siç është mundësia që inteligjenca artificiale t’u shpëtojë nga kontrolli krijuesve të saj. Në një intervistë për The New York Times, Gates kritikoi sektorin e teknologjisë për minimizimin e kërcënimeve që paraqet inteligjenca artificiale, vetëm për arsye financiare. “Privatisht, ata që e kuptojnë se sa shpejt po përparon kjo teknologji janë shumë të shqetësuar,” tha Gates, duke vënë në dukje se pak njerëz në industrinë e teknologjisë janë të gatshëm ta pranojnë këtë publikisht. “Ata i thonë njëri-tjetrit: ‘Mos e thuaj këtë, se na dëmton – në lojë janë miliarda dollarë që po përpiqemi të fitojmë’,” shtoi ai.
