Lajmi se kryeministri Rama do të mbyllë tik-tok-un për një vit ka pushtuar mediat ndërkombëtare, të cilat pasqyrojnë jo vetëm vendimin e kreu”t të qeverisë, por edhe reagimin zyrtar të Tik-Tok-ut. “Kryeministri i Shqipërisë ka njoftuar se qeveria synon të bllokojë aksesin në TikTok për një vit, pasi vrasja e një nxënësi shkolle muajin e kaluar ka shtuar frikën për ndikimin negativ të mediave sociale te fëmijët” shkruan BBC. “Duke folur të shtunën”, vazhdon po BBC, “Edi Rama deklaroi se ndalimi i propozuar do të nisë në janar. TikTok-u u shpreh ndërkaq se po kërkon sqarime urgjente nga qeveria shqiptare në lidhje me ndalimin e propozuar. Kjo platformë tha për BBC-në se nuk kishte gjetur asnjë prove, se personi që dyshohet se theri me thikë djalin 14-vjeçar, ose vetë viktima, kishin llogari në TikTok. Gjatë takimeve nëpër Shqipëri me mësues, prindër dhe psikologë, Rama e quajti TikTok-un si “banditin e lagjes”. “Ne do ta mbyllim për një vit, deklaroi ai, dhe do të fillojmë të hapim programe që do t’i shërbejnë edukimit të studentëve, duke ndihmuar prindërit të ndjekin rrugëtimin e fëmijëve të tyre”, tha Rama.
Bllokimi i TikTok vjen më pak se një muaj pasi një nxënës 14-vjeçar u vra dhe një tjetër u plagos në një përleshje pranë një shkolle në jug të Tiranës, e cila i kishte rrënjët në një konfrontim në rrjetet sociale. Vrasja ndezi një debat në Shqipëri mes prindërve, psikologëve dhe institucioneve arsimore për ndikimin e rrjeteve sociale tek të rinjtë”, shkruan BBC, e cila citon Ramën teksa shprehet se “Në Kinë Tik-Tok-u promovon sesi studentët mund të ndjekin kurse, si të mbrojnë natyrën, si të ruajnë traditat, kurse jashtë Kinës promovon vetëm llum dhe baltë. Pse na duhet kjo?”.
Sipas BBC, TikTok është tashmë i ndaluar në Indi, që ishte edhe një nga tregjet më të mëdha të aplikacionit përpara se të shpallej i jashtëligjshëm në qershor 2020. Tik-Tok është bllokuar gjithashtu në Iran, Nepal, Afganistan dhe Somali.
Ndërkaq, TikTok-u po lufton edhe kundër një ligji të miratuar nga Kongresi Amerikan, i cili nga 19 janari do a ndalojë aplikacionin nëse nuk shitet nga ByteDance – kompania mëmë kineze e saj.
