E teksa zgjedhjet parlamentare afrohen nga dita në ditë, dy kryetarët e partive më të mëdha në vend, PS-PD, kanë nisur garën për të na treguar ç’kanë bërë dhe çfarë jo, në mënyrë që kur 25 prilli i 2021-t t’ia behë, secili nga ne t’u drejtohet kutive të votimit, i bindur se ka zgjedhur alternativën më të mirë për veten dhe vendin.
Kështu, nëse i hedhim një sy faqes së fejsbukut të kryetarit të Partisë Demokratike, zotit Lulëzim Basha, shohim foto me takimet dhe shqetësimin e ndjerë prej tij, për gjendjen e banorëve të mbetur pa shtëpi, nga tërmeti i nëntorit të 2019-s, të cilët i shprehen të dëshpëruar për mos mbështetjen nga klasa politike në pushtet.
Ndërkaq, në faqen e fejsbukut të kryetarit të Partisë Socialiste, zotit Edi Rama, ku sheh përditënjë Shqipëri që ringrihet e lulëzon, ia beh një video që dëshmon me dokumente zyrtare se njerëzit e takuar prej Bashës janë mbështetës të PD-së, në poste zyrtare madje, të cilët qeveria Rama në pushtet, i ka trajtuar sikur gjithë të tjerët.
E në tërë këtë përplasje mes dy krerëve të dy Partive më të mëdha në vend, ajo që mbetet e ngulitur në mendje, foto, e video, është fytyra e pashpresë e njerëzve që rrojnë ende përjashta, të cilët, me shpresën se mos kapin gjësendi më shumë, bëjnë sa majtas, sa djathtas.
