Në një konferencë të drejtëpërdrejtë me gazetarët, kreu i PD-së Lulëzim Basha, ka hedhur poshtë akuzat e ish kreut të PD-së Sali Berishës, i cili e ka cilësuar si një njeri peng të Edi Ramës.
Tetë vjet me radhë Rama më ka quajtur kukull e Berishës, tha Basha. Dje Sali Berisha më ka akuzuar për peng të Edi Ramës. E para është gënjeshtër, e dyta nuk do të ndodhë kurrë. Të dyja, janë dy anë të të njëjtës medalje. Partia Demokratike po ecën përpara, Partia Demokratike do t’i prijë betejës popullore për ndryshim, që vjen vetëm përmes largimit të këtij regjimi dhe kthimit të vendit në shinat e demokracisë, të cilat sigurojnë një jetë të mirë për çdo shqiptar. Ky është misioni i Partisë Demokratike, ky është misioni i çdo demokrati, misioni im, dhe këtij do t’í qendroj me përkushtim, në arritjen e objektivave që nuk janë thjesht partiake, por janë kombëtare.
Sa i përket pretendimeve për referendume dhe kuvende, sqaroi Basha, kuvend të Partisë Demokratike, për të marrë në shqyrtim vendimet e qeverisë amerikane nuk ka për të pasur. Objektivat tona janë përballjet me Ramen dhe regjimin e tij dhe e gjithe energjia jonë është e fokusuar këtu.
Kujtojmë që dje Berisha, gjatë takimit me mbështetësit e të djathtës në Fier, e ka quajtur Lulëzim Bashën “PengBasha”.
Lul Basha, u shpreh Berisha këtë takim, ose PengBasha, do të jetë mirë të shkojë andej nga erdhi. Nuk ia ka bërë kush kurrë asnjë partie, atë që i bëri ky, ka thënë Berisha mes të tjerave në Fier.
