Nga Albana Nexhipi Lekaj
Kureshtia e të parit se kush nga “gladiatorët’ kishte dalë në sheshbetejën e arenës elektorale, nuk më la as mbrëmë pa bërë “zappingun” e përnatshëm.
Ajo që më tërhoqi vëmendjen, qenë daljet prime time, të dy kokave të PD-së, liderit historik të saj, Sali Berishës në Ora News, dhe ajo e liderit aktual, Bashës, tek News24.
M’u duk e çuditshme në fakt, që në kohë fushate, kur duhet të ketë në sfond vetëm një lider, me ide të qarta, që artikulon qartë vizionin e partisë, Berisha del në ekran po aq sa Lulëim Basha. Duket po aq e habitshme se si, teksa Luli përpiqet të bindë votuesin nga ekrani në ekran, se është i aftë të marrë në dorë frenat e Shqipërisë, po nga ekrani në ekran, shfaqet edhe Berisha, tashmë edhe kandidat për të qenë sërish pjesë e Parlamentit nëse fiton në zgjedhjet e 25 prillit, duke përshfaqur idetë dhe gjykimet e veta.
Me të drejtë mund të jenë të shumtë ata që mund të pyesin, po edhe? Berisha është lideri historik i PD-së, i takon të flasë! Dakord, por halli është që njerëzit, të mësuar të dëgjojnë Berishën për shumë vjite, janë më të prirur të besojnë atë se sa Lulin, të fokusohen më tepër tek ai, se sa tek Luli, të jenë të predispozuar, për hir të zakonit, t’i binden më shumë atij se sa Lulit, duke e lënë kështu këtë të fundit në hije, në përpjekjen e vështirë për të marrë pushtetin në mënyrë europiane, siç edhe pretendon vazhdimisht gjatë fushatës. Dhe Luli shfaqet vërtet si europian. Serioz, i qartë, me një gjuhë politike korrekte, por halli është se paraardhësi i tij nuk i mban ison, e jo vetëm që nuk ia mban, por i del edhe kondrapedal, si një zë i dytë që e vë poshtë.
“Një nga sfidat kryesore do të jetë edhe ndryshimi i kulturës politike në vend“, thotë Basha tek News 24, me qetësinë që e karakterizon, dhe me të drejtë, se sinqerisht vendi ka nevojë për kër këtë ndyshim, por ndërkohë të buçet ende në vesh Berisha nga OraNews, tek flet me intonacion të fuqishëm për Ramën dhe Ballukun: Ai është një turp dhe faqe e zezë njeri… që ka degraduar... Ngykësi Balluku …”
Dhe ti si votues i lëkundur mbetesh në udhëkryq, me disa pyetje që të vërtiten në mendje: kë nga qasjet të besosh, të Berishës a të Bashës?
Atë të konfliktit të të parit, apo atë europiane të të dytit?
Përse Berisha i bën hije Bashës?
A mos ndoshta Berisha e ka kuptuar që i vetëm Basha nuk ka për t’ia dalë dot Ramës, e me dëshirën për ta ndihmuar, si një baba i mirë, po i del në krahë?
A mos ndoshta, po si një baba i mirë, që kujdeset më tepër seç duhet për të birin, po i prish punë Bashës, duke e lënë në hije e duke e nxitur opinionin publik të besojë se PD-në e ka ende Berisha nën kontroll?
Me gjasa Berisha po përpiqet ta mbështesë, e jo t’i bëjë konkurrencë Bashës, por në kohë fushate ky dualitet krijon konfuzion vizionesh, e këto dy javë që kanë mbetur, PD-ja duhet të jetë më e qartë se kurrë, gjithnjë nëse synon edhe votuesin e lëkundur, atë që që do të besojë tek Luli, e po ashtu edhe tek politika e tij europiane.
