I pyetur prej gazetares Bianna Golodryga në ”Amanpour Show” mbi pritjen e refugjatëve afganë dhe numrin e tyre të lartë për një vend kaq të varfër si Shqipëria, Rama tha se kjo kishte të bënte me atë që ne ishim. Kjo është historia jonë, tha Rama. Shqipëria ka qenë i vetmi vend në Evropë, që kishte më shumë hebrenj pas Luftës së Dytë Botërore. Në fakt Shqipëria ka qenë një regjim mizor komunist, ne kishim talebanët tanë të kuq, dhe e dimë seç do të thotë të jetosh me ta. Duhet ta bëjmë këtë edhe për fëmijët tanë, të cilët duhet ta kalojnë këtë e të kuptojnë se në këtë botë ka një kohë kur merr dhe një kohë kur jep.
Në intervistën e tij, Rama theksoi mes të tjerave se Shqipëria do të priste rreth 4 mijë afganë, 2 mijë prej të cilëve qenë listuar tashmë, e dy mijë të tjerë priteshin të listoheshin.
I pyetur nëse qe i gatshëm t’i mbante në mënyrë të përherëshme këta afganë, nëse ata nuk do mund të shkonin dot në SHBA, Rama iu përgjigj se, Nuk është puna në jam i gatshëm, Ky është një vend ku kushtetuta e parë, Kanuni, këtu e 100 vite më parë, kishte të shkruar në paragrafin e parë se shtëpia e shqiptarit i përket zotit dhe mikut. Ata do të jenë miqtë tanë. Nëse duan të qëndrojnë janë të mirëpritur të qëndrojnë.
Vëllezërve dhe motrave tanë italianë u dukeshim si alienë, vazhdoi Rama, kur u afroheshim kufirit të tyre detar, por tashmë ne jemi të integruar atje. Italia po përfiton shumë nga ky integrim dhe shqiptarët po përfitojnë shumë nga të integruarit atje. Asokohe kishim nevojë të merrnim dhe morëm. Tani duhet të japim, këtë na ka mësuar jeta, theksoi Rama, teksa përsëriti për të disatën herë se 30 vjet të shkuara, shqiptarët kishin qenë qenë afganet e Evropës.
