Teksa bënte bilancin e pandemisë gjatë qeverisjes, në fjalën përmbyllëse të mandatit të dytë, kreu i qeverisë Rama njoftoi edhe largimin e doktoreshë Najada Çomos nga pozicioni i deputetes, për t’u kthyer sërish në atë të mjekes.
Jam sinqerisht i prekur nga komunikimi me doktoreshë Najada Çomon, tha Rama në fjalën e tij, e cila u bë edhe simboli i rezistencës së mjekëve dhe infermierëve në vijën e parë. Ajo më kërkoi përpara pak kohe, të pranoja tërheqjen e saj nga roli i ri i deputetes së sapozgjedhur të Kuvendit të Shqipërisë, duke e ndjerë shumë të fortë detyrimin për të mos u ndarë nga ekipi i saj fantastik, pikërisht në momentin kur varianti Delta i virusit, nisi të rimushë shtretërit e pavionit të terapisë intensive.
E falënderoj Najadën edhe publikisht siç bëra edhe personalisht, për këtë shembull kuptimplotë të ndjenjës së lartë ndaj detyrës, e ndaj atyre më në nevojë se askush tjetër, e i them sot një faleminderit shumë të madhe, dhe u përkulem me gjithë zemër, të gjithë atyre që deri këtu na kanë nxjerrë me kokën lart përballë armikut të padukshëm. Lufta nuk ka mbaruar, vjeshta dhe dimri mund të jenë sërisht të vështirë, por falë tyre janë shpëtuar me dhjetëra mijëra jetë, përfundoi Rama.
