Një vajzë 8 vjeçare ka gjetur vdekjen në fshatin belg të Strépy-Bracquegnies, për shkak se u sulmua prej qenit të shtëpisë. E vogla ndodhej në shtëpi vetëm me qenin dhe u gjend prej së ëmës, kur kjo e fundit u kthye në shtëpi, orët e vona të mbrëmjes.
Mediat vendase raportojnë se mamaja e ka gjetur të bijën në gjendje kritike kur është kthyer rreth orës 11 të darkës, dhe, edhe pse ambulanca e kishte shoqëruar menjëherë vajzën për në spital, sërish ajo kishte gjetur vdekjen.
Mediet vendase raportojnë po ashtu, se zjarrfikësit dhe polica që kishin shkuar në vendngjarje, e kishin gjetur qenin, një stratford amerikan, në gjendje tejet agresive, ndaj nuk kishin pasur zgjidhje tjetër, përveçse të shtinin mbi të.
Në banesë kishin qenë edhe dy qenë të tjerë, por, sipas autoriteteve në vend, dukej që nuk qenë përfshirë në sulm.
Sipas medieve vendase, tri qentë i përkisnin partnerit të nënës së vogëlushes.
Në vend kanë nisur hetimet për këtë ngjarje.
