Gjatë prezantimit të vizionit të PS-së për arsimin në një mandat të tretë të mundshëm, Rama nuk ngurroi të rreshtonte një sërë problematikash arsimore, të cilat sipas tij, lulëzonin vetëm në kohën kur qeveriste PD-ja. Teksa iu referua tri figurave kyçe për arsimin në fushatën aktuale të Partisë Demokratike, Mark Markut, Albana Vokshit, dhe Agron Gjekmarkajt, Rama tha se qe krenar që gjatë këtyre shtatë viteve, PS-ja e kishte arritur ta çlironte arsimin nga kthetrat e politikës, duke rikthyer jo vetëm dinjitetin e nëpërkëmbur të mësuesit, por edhe imazhin e një arsimi bashkëkohor.
Sot mitingjet nëpër shkolla, ku nxënësit dëgjonin opozitën duke sharë, duken pjellë fantazie e shthurur, por në një kohë jo të largët, kur qeverisnin këta që duan të kthehen në drejtim, për ta vënë arsimin nën hyqmin e Markut e të Gjekmarkut, ky ishte realiteti i marrëdhënies së hidhur të pushtetit më shkollën. Ja ku janë 3 janë ministriat e arsimit të KÇK-së, dy personazhe auto-satirike, të klubeve të natës mediatike, dhe një zonjë, e njohur vetëm për fjalorin sharje-shpifës, foltore më foltore, të tre reaksionarë, sharrëshinj, si sharrë-xhi, sharro me sharrë, edhe si sharëxhinj, shaj e shaj, sharëxhinj e kujexhinj, vër kujën për çdo gjë që bëhet, për çdo punë që niset, kundër reformës në arsim, kundër reformës në universitet, kundër çlirimit të shkollës nga tekstet e Bahri Fallinjëve dhe Muço Tafajve të kohës, kundër, kundër, kundër, me të shara e me kuje. Vetëm imagjinoni njërin nga të tre në krye të arsimit, dhe merreni me mend pastaj fëmijën tuaj, mësuesin e fëmijës tuaj, shkollën e fëmijëve tuaj, largqoftë, në duart e kujtdo prej këtyre të treve.
Unë jam krenar që PS e çliroi shkollën nga kthetrat e politizimit absurd dhe i ktheu mësuesit dinjitetin e figurës së tij të domosdoshme në shoqëri, duke vendosur në bazën e sistemit tonë arsimor, pacënueshmërinë e mësuesëve në detyrë dhe meritën në rekrutimin e mësuesëve të rinj. Sot, mësuesit e vjetër, në thonjëza të vjetër por që kanë aty vendin prej kohësh, janë të palëvizshëm nga ai vend për tekat e politikës apo për tekat e tarafit dhe rryshfetit, ndërsa të rinjtë e fitojnë vendin e punës përmes një institucioni të pavarur, transparent dhe të patejkalueshëm, portalit ‘Mësues për Shqipërinë’, i cili është kthyer në një mekanizëm ligjor eksluziv, për rekrutimin e mësuesëve. Plot 11.078 mësues e mësuese janë pjesë e sistemit tonë arsimor falë konkurimit, falë portalit ‘Mësues për Shqipërinë dhe klasifikimit në atë portal, në këto vite transformuese për shkollën, por mbi të gjitha për dinjitetin e mësuesit.
Sot tekstet shkollore janë falas për 250 mijë nxënës, dhe librat për fëmijët tanë janë prodhime të shtëpive prestigjoze të Oksfordit, Kembrixhit dhe Pirsonit, shtëpi botuese që ushqejnë me libra fëmijët e Europës, që janë sot një pikë referimi e palëvizshme me metodologjinë e qartësinë e tyre. Infrastuktura arsimore është në një transformim të vazhdueshëm dhe, deri më sot ne kemi investuar 130 milion dollarë për 263 shkolla të reja, ku mësojnë 114 mijë nxënës. Këtë vit vazhdon papushim rindërtimi i 120 shkollave të reja për 40 mijë nxënës të tjerë. Kemi ngritur shkolla me kushte optimale, por jam unë i pari që them nuk mjaftojnë. Vizioni ‘Shqipëria 2030’ për shkollën shqiptare, shkon shumë më përtej se këto që kemi bërë, dhe ambicja jonë është shumë më e madhe se sa një infrastukturë e standardeve europiane, se sa librat e prodhuara me standarde europiane, se sa mësusit të ndihen ne vendin e tyre me dinjitet, tha Rama, i cili pohoi se në mandatin e tretë, do t’ua rriste pagat arsimtarëve edhe me 40 %.
