OpenAI ka arritur një marrëveshje me Pentagonin për përdorimin e modeleve të veta të inteligjencës artificiale, në rrjetet e saj më konfidenciale. Drejtori Ekzekutiv Sam Altman, njoftoi marrëveshjen, duke theksuar se gjatë negociatave, Pentagoni tregoi një “respekt të thellë për sigurinë”. Kjo potencialisht mbush boshllëkun e krijuar nga largimi i Anthropic-ut: Altman tha se vijat e kuqe që ishin pika kyçe në mosmarrëveshjen e Anthropi-utc me Pentagonin, shënojnë partneritetin e ri me OpenAI, duke shpjeguar se përdorimi i modeleve të inteligjencës s[ë saj artificiale, do të shoqërohet me garanci të caktuara.
“Dy nga parimet tona më të rëndësishme të sigurisë janë ndalimi i mbikëqyrjes masive në gjithë vendin dhe llogaridhënia njerëzore në përdorimin e forcës, duke përfshirë sistemet autonome të armëve”, shkroi Altman, duke shtuar se Departamenti i Mbrojtjes “i bashkëndan këto parime, i pasqyron ato në ligj dhe politika, dhe ne i kemi përfshirë ato në marrëveshjen tonë”. Ai shtoi se: “Ne do të zbatojmë masa mbrojtëse teknike, për të siguruar që modelet tona të funksionojnë siç duhet, gjë që është edhe ajo që Pentagoni kishte ndërmend.” Altman deklaroi po ashtu, se shpreson që Pentagoni të “ofrojë të njëjtat kushte për të gjitha kompanitë e inteligjencës artificiale” si një mënyrë për t’i “pakësuar tensionet nga dispozitat ligjore dhe qeveritare, drejt marrëveshjeve të arsyeshme”.
