Presidenti Donald Trump ka deklaruar ditën e hënë se Tylenoli dhe vaksinat janë shkaqet kryesore të autizmit.
Deklarata e bërë nga zyra e Presidencës amerikane ka ngjallur shumë diskutime, duke vënë në lëvizje shkencëtarët për të dëshmuar të kundërtën sipas evidencave të tyre.
“Mos merrni Tylenol,” iu drejtua Trump grave shtatzëna shumë herë gjatë konferencës për shtyp në Shtëpinë e Bardhë, duke u bërë thirrje gjithashtu nënave që të mos ua japin foshnjave ilaçin njohur në SHBA me emrin e përgjithshëm acetaminofen ose paracetamol në shumicën e vendeve të tjera.
Trump nxiti gjithashtu pretendimet e hedhura poshtë prej kohësh, se përbërësit e vaksinave ose koha e injeksioneve afër njëra-tjetrës, mund të kontribuojnë në rritjen e shkallës së autizmit në SHBA, pa ofruar asnjë provë mjekësore.
Njoftimi, i cili duket se mbështetet në studime ekzistuese dhe jo në kërkime të reja të rëndësishme, vjen ndërsa lëvizja Make America Healthy Again, ka kërkuar përgjigje mbi shkaqet e autizmit.
Koalicioni i mbështetësve të Sekretarit të Shëndetësisë Robert Kennedy Jr., përfshin disa aktivistë kundër vaksinimit, të cilët kanë përhapur prej kohësh pretendimet se vaksinimet janë përgjegjëse.
