Kreu i vendit ka ngjallur shumë reagime me përdorimin e disa fjalëve me konotacion negativ gjatë fushatës. E ftuar në emisionin “Ora e Betit”, në Ora Neës, opinionistja Albana Nexhipi Lekaj, u shpreh se qëllimi i vetëm i tyre është të largojë nga dalja në votime e shtresës gri, asaj që ai nuk e di se nga do të marrë e që mund të bëjë diferencën në rezultat.
“Unë do të sjell në vëmendje një thënie që të gjithë e njohim, mjeti justifikon qëllimin”, u shpreh Lekaj në fjalën e saj e pyetur nga gazetarja Beti Njuma. “E kam parë me shumë vëmendje këto ditë kryeministrin Rama, për të kuptuar se kur rreh ai përmes fjalëve të tij. Ju sollët disa në vëmendje, jo çyryk, dashnorë e të tëra me radhë. Çështja është që ne duhet të shtrojmë një pyetje: kujt audience i drejtohet ai, kujt votuesi i drejtohet me këto fjalë, të majtëve, të djathtëve apo asaj shtresës gri e cila në fakt bën edhe diferencën? Natyrisht, së pari ai vlerëson kontekstin në të cilin ndodhet, pra nëse është me gratë, mburr gratë, nëse është me të rinjtë, hedh kështu si argument, që edhe unë kam qenë çapkën e kam dalë nudo, por ja, këta nuk e duan lirinë, unë e dua lirinë dhe e kam shijuar kur kam qenë sa juve, pra ai e zgjedh audiencën dhe hedh shashka të ndryshme, por ajo që unë kuptoj, nga të gjitha fashat e ligjërimit të tij, është që atij nuk i intereson që në votime të dalë ajo që quhet fasha gri e që mund të bëjë diferencën. Rama u flet militantëve të vet, Rama i flet besoj administratës, e ka po të vetën, dhe nuk ma do mendja se ai ka ndërmend që me këtë ligjërim, të përfshijë edhe ata intelektualë, shtresë e mesme që janë të luhatur dhe të pavendosur nga do të venë. Sepse termat që ai përdor, nuk të afrojnë, janë terma që të lënë indiferentë. A e ndihmon ky komunikim në ndërtimin e një profili karizmatik? Rama është karizmatik, por të jesh karizmatik është një gjë, dhe të bësh politika të mira dhe të marrësh mandatin e radhës është tjetër gjë. Unë besoj se Ramës nuk i intereson fare gara politike. Rama, mbahet mend shumë mirë, ka qenë shumë më i fortë me batutat dhe skenat, kujtoni defin, sëpatën e me radhë… Tani nuk po bën gjë, tani ka nxjerrë ca gra aty që këndojnë e kërcejnë… Unë jam e sigurt që Rama e ka kapacitetin, nëse do të dojë, por mua, Rama, në pikëpamje të artikulimit të tezave politike, ka rënë, është në një gjendje vegjetimi, shkon, shfaqet, flet, përmend pasaportën europiane, bufin, i bie kundërshtarit, por nuk është se ofron një gjë të re, nuk është se të sjell një argument të ri, që ti të thuash, dakord, nuk kam votuar tërë këto kohë, por tani do dal…”, tha mes të tjerave opinionistja Lekaj
